Von á norðanáhlaupi og gular viðvaranir taka gildi í kvöld

Atli Ísleifsson skrifar 28. janúar 2022 06:56

Gular viðvaranir vegna hríðar taka gildi fyrir norðanvert landið undir kvöld. Veðurstofan

Skammt vestan við Vestfirði er nú 984 millibara lægð sem veldur því að á landinu er suðvestan átta til fimmtán metrar á sekúndu og víða él. Þegar líður á daginn mun lægðin fara austur með norðurströndinni og því er von á skammvinnu norðanáhlaupi síðdegis og í kvöld. Gular viðvaranir taka gildi víða á landinu í síðar í dag.

Í hugleiðingum veðurfræðings segir að reikna megi með norðan og norðvestan fimmtán til 23 metrar á sekúndu og snjókomu og því munu viðvaranir vegna hríðar taka gildi fyrir norðanvert landið undir kvöld.

„Í nótt og í fyrramálið má síðan búast við norðvestan storm á Austfjörðum og á Suðausturlandi með tilheyrandi vindaviðvörunum en á sama tíma dregur úr vindi í öðrum landshlutum.

Á morgun er svo von á suðvestan 5-13 m/s og él en þá léttir að sama skapi til norðaustan- og austanlands.

Hiti verður yfirleitt í kringum frostmark í dag og á morgun, en þó verður heldur kaldara meðan norðanáttin verður ríkjandi á landinu,“ segir á vef Veðurstofunnar.

Gular viðvaranir:

Vestfirðir. Norðan hvassviðri eða stormur og hríð. 28. jan. kl. 17:00 – 22:00
Strandir og Norðurland vestra. Norðan og norðvestan hvassviðri eða stormur og hríð. 28. jan. kl. 17:00 – 23:00.
Norðurland eystra. Vestan og norðvestan hvassviðri eða stormur og hríð. 28. jan. kl. 17:00 – 29. jan. kl. 05:00.
Austurland að Glettingi. Vestan og norðvestan hvassviðri eða stormur og hríð. 28. jan. kl. 20:00 – 29 jan. kl. 06:00
Austfirðir. Vestan stormur eða rok. 28. jan. kl. 21:00 – 29. jan. kl. 09:00
Suðausturland. Norðvestan stormur eða rok. 28. jan. kl. 21:00 – 29. jan. kl. 10:00
Spákort fyrir klukkan 17 í dag.Veðurstofan

Veðurhorfur á landinu næstu daga

Á laugardag: Suðvestlæg eða breytileg átt 5-13 m/s og bjart að mestu, en norðvestanstormur og él austantil um morguninn. Þykknar upp með éljum vestanlands eftir hádegi, en léttir til og dregur hratt úr vindi austanlands. Frost 0 til 8 stig.

Á sunnudag: Suðvestlæg átt, 5-13 m/s og él, en bjart með köflum norðaustanlands. Frost 2 til 10 stig. Vaxandi vestanátt vestantil um kvöldið.

Á mánudag: Vestlæg átt, víða dálítil él og kalt í veðri. Vaxandi suðaustanátt með snjókomu seinnipartinn.

Á þriðjudag: Norðanátt með éljum og kólnandi veðri.

Á miðvikudag og fimmtudag: Norðlæg átt og snjókoma norðantil en bjartviðri sunnan heiða. Frost um allt land.

Veður