Fimm ungir sem gætu bankað á landsliðsdyrnar

Íslenska handboltalandsliðið náði sínum besta árangri á stórmóti í átta ár þegar það lenti í 6. sæti á EM í Ungverjalandi og Slóvakíu.

Íslenska liðið varð fyrir miklum skakkaföllum á meðan Evrópumótinu stóð og Guðmundur Guðmundsson notaði alls 24 leikmenn á mótinu. Aðstæðna vegna stækkaði hópur íslenska liðsins því umtalsvert.

Ungir og efnilegir bíða einnig á kantinum. Vísir fór yfir nokkra leikmenn sem gætu komið inn í landsliðið á næstu árum.

Þorsteinn Leó Gunnarsson, 19 ára skytta Aftureldingar

Í öllum meiðslunum sem herjuðu á lið Aftureldingar á síðasta tímabili leitaði Gunnar Magnússon til Þorsteins Leós Gunnarssonar. Hann átti stórgóða innkomu í lið Mosfellinga og sýndi flotta takta. Þorsteinn er frekar „óíslenskur“ leikmaður ef svo má að orði komast, skytta sem telur 2,05 metra og getur skotið af löngu færi. Þrátt fyrir stærðina er Þorsteinn glettilega lipur og fínasti gegnumbrotsmaður. Þorsteinn getur enn bætt sig mikið en er maður framtíðarinnar.

Einar Þorsteinn Ólafsson, 20 ára varnarmaður Vals

Líkt og Þorsteinn fékk Einar Þorsteinn Ólafsson tækifæri í liði Vals á síðasta tímabili vegna mikilla meiðsla. Og hann greip það með báðum höndum. Nánast á augabragði var hann orðinn lykilmaður í vörn Valsmanna sem urðu Íslandsmeistarar. Það hefðu þeir ekki gert án Einars en eftirminnilegur stuldur hans gegn Eyjamönnum í seinni leik liðanna í undanúrslitum úrslitakeppninnar verður lengi í minnum hafður. Einar hefur haldið uppteknum hætti á þessu tímabili. Ótrúlega klár og fingralangur varnarmaður sem er einnig í stóru hlutverki í hraðaupphlaupum Vals. Má bara nýta færin sín betur. Einar æfði með landsliðinu síðasta haust og var í 35 manna EM-hópnum. Hans tími með landsliðinu mun koma.

Tryggvi Þórisson, 19 ára línumaður Selfoss

Selfoss hefur séð íslenska landsliðinu fyrir fjölmörgum leikmönnum undanfarin ár og Tryggvi Þórisson gæti verið sá næsti af færibandinu í Mjólkurbænum. Tryggvi er stór og afar stæðilegur línumaður sem hefur verið í stóru hlutverki í varnarleik Selfoss undanfarin þrjú tímabil. Tækifærin í sókninni hafa verið færri enda í samkeppni við Atla Ævar Ingólfsson. Þeim fer þó fjölgandi og vonandi nýtir hann þau vel.

Dagur Gautason, 21 árs hornamaður Stjörnunnar

Akureyringurinn vakti fyrst almenna athygli þegar hann var valinn í úrvalslið EM U-18 ára 2018 þar sem Ísland endaði í 2. sæti. Eftir að hafa verið í lykilhlutverki hjá KA í nokkur ár gekk Dagur Gautason í raðir Stjörnunnar fyrir síðasta tímabil. Hann var nokkuð rólegur á því en hefur spilað mjög vel í vetur þrátt fyrir að missa talsvert úr vegna meiðsla. Dagur var kallaður út til Búdapest til að vera til taks í lokaleikjum Íslands á EM og fékk þar nasaþefinn af landsliðinu. Dagur er gríðarlega snöggur, mikill íþróttamaður og fínasti varnarmaður þrátt fyrir að vera ekki mikill fyrir mann að sjá. Hann mun væntanlega berjast við Hákon Daða Styrmisson og Orra Frey Þorkelsson um stöðu númer tvö í vinstra horninu á næstu árum.

Darri Aronsson, 22 ára skytta Hauka

Darri Aronsson sneri fílefldur til baka eftir að hafa slitið krossband í upphafi þarsíðasta tímabils og kom aftur sem mun betri leikmaður, sérstaklega í sókn. Hann er með góð skot, bæði með uppstökkum og af gólfinu, og er skynsamari í varnarleiknum en áður. Hann kom óvænt inn í íslenska landsliðið á EM og kom við sögu í tveimur leikjum og skoraði eitt mark. Darri gæti nýst íslenska landsliðinu í framtíðinni en þarf að komast í atvinnumennsku til að bæta sig enn frekar.