Þurfum kannski að hafa aðeins meira kontról á okkar leik

„Svona ef við horfum á þetta strax eftir leik þá erum við að klikka á mikið af dauðafærum í seinni hálfleiknum sérstaklega,“ sagði Halldór að leik loknum.

„Við erum líka með of marga tæknifeila. Það er kannski það sem klárar okkur. Við fáum 30 mörk á okkur sem er ekkert líkt okkur heldur, en leikurinn var hraður og við hefðum auðveldlega getað skorað 33 mörk í kvöld.“

„En svo eru þetta líka einföld mistök varnarlega á sama tíma og við erum að klikka á hinum endanum. Við komum samt til baka og þá förum við aftur að gera okkur seka um aulamistök. Það var margt sem var fínt en þetta svíður samt svona strax eftir leik. Þrjú víti og öll þessi dauðafæri.“

Leikurinn var í járnum allan fyrri hálfleikinn, en Haukarnir sigu fram úr snemma í síðari hálfleik þegar Aron Rafn Eðvaldsson gjörsamlega lokaði búrinu. Halldór segir að þrátt fyrir að Aron sé góður markvörður, þá geti Selfyssingar líka sjálfum sér um kennt.

„Við vitum að Aron er frábær markmaður og allt það. En við erum að skjóta mikið á fyrsta tempói og í millihæð. Við erum að skjóta beint út frá hendi og taka skot sem góðir markmenn taka bara.“

„Það svíður auðvitað af því að við erum að skjóta á þrjá góða markmenn á æfingum og eigum að vita þetta. Við eigum bara að gera betur í þessum dauðafærum.“

Selfyssingar hafa oftar en einu sinni misst jafnan leik niður í nokkuð stórt tap á þessu tímabili og það virtist stefna í það í dag. Þeir komu þó til baka og gerðu þetta að leik aftur, en Halldór segir að liðið verði að reyna að eyða þessum kafla úr sínum leik.

„Snemma í vetur voru auðvitað allt of oft of miklar sveiflur í okkar leik. Það orsakaðist kannski að einhverju leiti af því að okkur vantaði gríðarlegan fjölda af leikmönnum.“

„Þennan síðasta eina og hálfan mánuð vorum við samt bara helvíti góðir og söfnuðum alveg fullt af stigum. Þessi frammistaða í dag var kannski ekkert langt frá því að mörgu leiti. Betri heldur en var í upphafi tímabils allavega.“

„En við þurfum kannski að hafa aðeins meira kontról á okkar leik og við erum alltaf að reyna að vinna í því. Það var sérstaklega í seinni hálfleik sem við missum leikin svolítið frá okkur, en eins og ég segi þá er það aðallega af því að við erum að klikka á mikið af dauðafærum og svekkja okkur á því varnarlega. Missum menn og erum að gera tvöfalda feila. Eins og bara með Tryggva Þóris, hann klikkar á færi og tekur það með sér í varnarleikinn og klikkar aftur. Það er kannski smá reynsluleysi sem hann lærir þá bara af með ákveðnum aldri og tíma.“

Að lokum sagði Halldór nokkur orð um Sverri Pálsson sem var að leika sinn fyrsta keppnisleik í 999 daga eftir löng og erfið meiðsli.

„Við höfum tekið mjög langan tíma með Sverri á gólfinu. Hann byrjaði að æfa með okkur í nóvember og hann hefur eflst með hverri vikunni síðan þá. Við þurfum bara að passa upp á hann því hann hefur náttúrulega gríðarlega reynslu og hæfileika sem varnarmaður.“

„Hann kom mjög sterkt inn í dag og stóð sig bara vel. Ég er fyrst og fremst ánægður fyrir hans hönd að koma til baka eftir þetta langa meiðslaferðalag. Eins og þú segir, 999 dagar. Það væri einhver búinn að gefast upp. En hann er hér og fyrir það erum við ótrúlega þakklátir og ánægðir fyrir hans hönd,“ sagði Halldór að lokum.