Míglak inn í Tennis­höllina í ó­veðrinu

Jónas Páll Björnsosn framkvæmdastjóri Tennishallarinnar segir í samtali við fréttastofu að vesen hafi verið á fráveitukerfi í húsinu. Fella þurfti niður nokkrar æfingar í dag vegna vatnsins. 

„Þetta er nú ekki mikið tjón, þó þetta sé náttúrulega smá tjón, en ekkert alvarlegt. Þetta er aðallega bara hundleiðinlegt. Við héldum að við værum búnir að laga þetta til skamms tíma með dælum en þær voru bara ekki nógu öflugar,“ segir Jónas Páll.

„Ég held að þetta sé vonandi boði um það að það verði gott sumar. Og frábært tennis og padel sumar,“ segir Jónas Páll brattur miðað við aðstæður.

Fimm tennisvellir eru í húsinu, tveir í öðrum enda hússins og þrír í hinu. Þá eru tveir padel-vellir en íþróttin hefur notið aukinna vinsælda síðan vellirnir voru byggðir í fyrra. Börn og unglingar af öllu höfuðborgarsvæðinu stunda tennis í Tennishöllinni sem er eina innanhússaðstaðan á landinu.