Ármann tryggði sér deildarmeistaratitilinn með stórsigri

Yfirburðir Ármanns voru miklir strax frá fyrstu mínútu, en liðið hafði tíu stiga forskot að fyrsta leikhluta loknum. Ármann jók forystu sína umtalsvert fyrir hálfleikshléið, en staðan var 38-18 þegar gengið var til búningsherbergja.

Heimakonur gerðu svo endanlega út um leikinn í þriðja leikhluta þar sem þær skoruðu 28 stig gegn aðeins átta stigum Vestra. Leikmenn Ármanns gátu því leyft sér að slaka aðeins á í lokaleikhlutanum, en lokatölur urðu sem fyrr segir 80-46.

Schekinah Sandja Bimpa átti flottan leik í liði Ármanns og skoraði 26 stig, ásamt því að taka 15 fráköst og gefa fjórar stoðsendingar. Í liði Vestra var Sara Emily Newman atkvæðamest með 12 stig.

Þrátt fyrir að liðið sé búið að tryggja sér deildarmeistaratitilinn er sæti í efstu deild ekki í höfn. Ármann mætir liðinu sem hafnar í fjórða sæti deildarinnar í úrslitakeppni um sæti í Subway-deild kvenna á næsta tímabili.