Svona verður veðrið um páskana

Þetta kemur fram á vef Veðurstofunnar. Þar segir að búast megi við svipuðum vindstyrk á morgun, þó heldur bæti í heldur en dragi úr á vestanverðu landinu. Skýjað að mestu sunnan- og vestanlands og dálítil væta á köflum á morgun, en bjartviðri norðaustanlands. Hiti kemur til með að breytast lítið.

Veðurhorfur á landinu næstu daga:

Á morgun, föstudaginn langa:

Sunnan 8-15 m/s, en 15-20 í vindstrengjum við fjöll á vestanverðu landinu. Skýjað og dálítil væta, en þurrt á Norður- og Austurlandi. Hiti 7 til 13 stig.

Á laugardag:

Suðaustan og sunnan 8-15, en dregur úr vindi síðdegis. Súld eða rigning með köflum, en yfirleitt þurrt um landið norðaustanvert. Hiti breytist lítið.

Á sunnudag, páskadag:

Breytileg átt 3-8 með vætu í flestum landshlutum. Heldur kólnandi.

Á mánudag, annan í páskum, og þriðjudag:

Fremur hæg breytileg átt. Skýjað að mestu á landinu, en úrkomulítið. Hiti 2 til 8 stig, mildast syðst.

Á miðvikudag:

Sunnanátt með rigningu eða slyddu, en þurrt norðaustanlands. Hiti 2 til 7 stig.