Félagsmenn Eflingar hafa leitað til VR vegna hópuppsagnar

Ragnar Þór Ingólfsson, formaður VR, segir að stéttarfélagið hafi strax ákveðið að taka á móti öllum þeim sem fengu uppsagnarbréf frá Eflingu, líka þeim sem eru félagsmenn Eflingar. Það sé þeirra grundvallarskylda að sinna réttargæslu fyrir fólk sem lendi í slíku.

„Það er nú kannski fyrst og fremst vegna þess að þetta var, og er, sérstök staða þegar starfsfólki er sagt upp hjá sínu eigin stéttarfélagi og verkalýðshreyfingin hefur svo sem ekki sett neinar viðbragðsáætlanir þegar slíkt gerist þannig að við ákváðum að bjóða öllum að koma og sjá til þess að það væru sérfræðingar hérna frá okkur, lögmenn og aðrir sem þurfa koma að svona málum sem væru til taks.“

Fjölmargir hafi leitað til VR vegna hópuppsagnarinnar.

„Eftir því sem ég best veit hefur okkar fólki gengið mjög vel að taka á móti starfsfólki Eflingar“

Síðustu mánuði hefur mikið gengið á innan verkalýðshreyfingarinnar og hafa ásakanir og gífuryrði gengið á víxl - opinberlega. Ragnar segist, aðspurður, telja að átökin muni ekki hafa neikvæð áhrif á næstu kjarasamningalotu sem er í haust Það hafi þurft að hreinsa andrúmsloftið.

„Það verður stundum að stinga á ákveðin kýli þegar illa gengur í samskiptum og það er best að gera það áður en að það reynir virkilega á samstöðuna. Ég er mjög bjartsýnn á, og það hefur alltaf verið mín helsta von, að hreyfingin geti staðið þétt saman sem ein heild til að ná fram bæði þeim kjarabótum sem við viljum og sömuleiðis líka þeim nauðsynlegu kerfisbreytingum sem þurfa að eiga sér stað í íslensku samfélagi.“

Ragnar segir að hreyfingin hafi hingað til náð að þétta raðirnar á þeim tímum sem þess hefur verið krafist.

„Ég er nokkuð bjartsýnn á að við komumst standandi út úr þessu og sameinuð fyrir næstu kjarasamninga“.

Þú telur ekki að of mikið hafi verið sagt og of stór orð verið látin falla til að hægt verði að ná saman?

„Verkefnið fram undan er mun stærra en persónur og leikendur. Við höfum ákveðnar grundvallarskyldur gagnvart okkar félagsmönnum og samfélaginu og ég held að þó að fólk hafi tekist mjög harkalega á - margt verið sagt og margt verið gert - þá þekki ég engan í verkalýðshreyfingunni sem vill ekki félagsfólkinu sínu vel og brennir ekki fyrir því að ná fram góðum kjarasamningi og kerfisbreytingum sem gagnast samfélaginu, ekki bara núna heldur til framtíðar.“

Ragnar var spurður hvort verkefnið fram undan væri að ná sáttum og þétta raðirnar.

„Já, að sjálfsögðu. Fyrst og fremst þurfa stéttarfélögin að klára sínar kröfugerðir og síðan þurfum við bara smá rými til að draga andann og svo þurfum við að setjast niður og horfa á þetta út frá verkefninu og þeim áskorunum sem standa frammi fyrir okkur. Okkur hefur tekist þetta hingað til að þétta raðirnar þegar á þarf að halda og ég er sannfærður um það að okkur takist það með einum eða öðrum hætti að komast sameinuð í gegnum þetta fyrir haustið. Ég leyfi mér bara að vera bjartsýnn og ég held að málefnalega eigum við margt sameiginlegt.“

Ragnar nefnir húsnæðismálin sérstaklega í þessu samhengi.

„Ég veit það í hjarta mínu að verkalýðshreyfingunni muni takast að þétta raðirnar og koma sameinuð að samningaborðinu í haust. Við bara verðum að gera það. Verkefnin eru af þeirri stærðargráðu að það er einfaldlega ekkert annað í boði.“