Björgunar­sveitir í bið­stöðu en vís­bendingar af skornum skammti

Fréttastofa hefur ekki náð tali af lögreglu vegna málsins í morgun en Ríkisútvarpið hefur eftir Elínu Agnesi Kristínardóttur aðstoðaryfirlögregluþjóni hjá lögreglu á höfuðborgarsvæðinu að ekki hafi borist haldbærar vísbendingar um ferðir Svanhvítar. Verið sé að ræða við aðstandendur og ákveða hvert beina eigi næsta áfanga leitarinnar. Lögregla líti málið alvarlegum augum.

Yfir hundrað björgunarsveitarmenn leituðu Svanhvítar í Hafnarfirði og nágrenni lengi frameftir í gær og búist er við að svipaður fjöldi haldi til leitar í dag.

Svanhvít er 167 sentimetrar á hæð, sólbrún, með ljóslitað rúmlega axlarsítt hár. Síðast er vitað um ferðir hennar um klukkan eitt þegar hún fór frá heimili sínu á Völlunum í Hafnarfirði. Hún var þá klædd í gráar joggingbuxur og hettupeysu. Hún er talin hafa verið á hvítu rafhlaupahjóli.