Beið á bráðamóttökunni í þrettán klukkutíma: „Mér leið bara eins og ég væri í bíómynd“

Landspítalinn og heilbrigðisyfirvöld reyna nú að gera allt sem í þeirra valdi stendur til að minnka álag á heilbrigðiskerfið en staðan er víða slæm. Á bráðamóttökunni hefur verið varað við langri bið og hættu til að mynda fjórir hjúkrunarfræðingar vegna álags í gær.

Steinunn Gestsdóttir, aðstoðarrektor kennslumála og þróunar við Háskóla Íslands, er meðal þeirra sem þurfti nýverið að leita á bráðamóttöku. Sjálf hafði hún heyrt fregnir af slæmri stöðu á bráðamóttökunni en ekkert í líkingu við það sem hún upplifði.

„Maður eiginlega trúði þessu ekki. Þetta var bara ófremdarástand,“ segir Steinunn en frá því að hún mætti þar til hún komst loksins heim aftur liðu þrettán klukkustundir.

Hún lýsir því að tiltölulega fáir hafi verið á biðstofunni þegar hún mætti en engu að síður þurfti hún að bíða í um fimm klukkutíma eftir því að komast að.

Á þeim tíma sá hún meðal annars grátandi konu gefast upp á biðinni eftir fjóra tíma, önnur sat grátandi og verkjuð út í horni, og þar að auki leið yfir tvo karlmenn.

„Mér leið bara eins og ég væri í bíómynd. Þetta var eitthvað svo fáránlegt að við værum hérna í þessu velferðarríki og þetta var langt út fyrir allt sem getur talist ásættanlegt,“ segir hún. „Ef þetta væri ekki svona alvarlegt og manni liði ekki svona illa þá hefði ég nú bara gert stuttmynd um ástandið, þetta var svo ofsalega súrrealískt.“

Starfsfólkið framúrskarandi þrátt fyrir gríðarlegt álag

Þó að staðan hafi vægast sagt verið erfið fyrir sjúklinga sem biðu segir Steinunn starfsfólkið hafa verið framúrskarandi og ekki á þeim að sjá að þau væru undir gríðarlegu álagi. „Það var svo innilega ekki við starfsfólkið að sakast og þau höndluðu þetta ótrúlega vel.“

„Maður sá að það lagði allt í að reyna að þjóna öllum sem allra fyrst. Það var svo faglegt og vandvirkt, en það er bara svo mikið sem þau gátu gert og svo bara bættist fólk við,“ segir Steinunn en þegar hún fór sjálf var móttakan orðin full.

Hún segir ljóst að þörf sé á breytingum, enda staðan óboðleg bæði fyrir starfsfólk og sjúklinga. Þá þurfi fólk að vera vel undirbúið til að eyða deginum í að sækja þjónustu. „Þú þarft eiginlega að vera í toppformi til að komast að og þrauka þennan tíma,“ segir Steinunn.

„Þetta getur ekki talist eðlilegt í ríku landi eins og Íslandi, að það sé ekki hægt að bjóða upp á bráðamóttöku sem sinnir fólki sem sannarlega er mjög veikt,“ segir hún enn fremur.