„Mjög tilfinningarík skipti“

Hún verður fertug á næsta ári og segir að enginn aldur sé of seinn að elta ástríðuna. Hún tekur einn dag í einu og er bjartsýn fyrir framtíðinni. Rætt var við Evu Ruzu í Íslandi í dag á Stöð 2 í gærkvöldi.

„Ég reyni alltaf að fara út að hlaupa eða taka einhverja æfingu á morgnanna. Ég verð að byrja daginn minn þannig. Annars finnst mér ég vera þreytt allan daginn,“ segir Eva. Eva starfaði í blómabúð með móður sinni í tuttugu ár.

„Það er ótrúlega skrýtið fyrir mig að vera kominn út úr kassanum. Ég er svo mikil kassakona og vil að það sé alltaf rútína og vil hafa öryggi í kringum mig. Að ég hafi tekið þetta skref, ég held að enginn geri sér grein fyrir því hvað þetta var ótrúlega stórt og þetta voru mjög tilfinningarík skipti,“ segir Eva en móðir hennar rak blómabúðina Ísblóm við Háaleitisbraut í öll þessi ár. Eva Ruza er einn vinsælasti skemmtikraftur landsins og kemur hún reglulega fram sem veislustjóri og fleira í þeim dúr.

„Ég fann að ástríðan mín var að standa á sviði og ég fæ oft gæsahúð þar þegar ljósin koma á mig. Ég fann að það var orðið meira þar heldur en í blómabúðinni. Það hjálpaði mér að taka stökkið.“

Hún segist vinna ýmist á samfélagsmiðlum og að koma fram sem skemmtikraftur.

„Reyndar fer ég ekki með uppistand, ég á það eftir,“ segir Eva og hlær en hún hefur alltaf haft það markmið að starfa í þessum bransa. Það var til að mynda markmið Evu undir lok grunnskólagöngunnar að komast í dálkinn Hverjir voru hvar í Séð & Heyrt en hér að neðan má sjá innslagið í heild sinni.