Erlent

Senda fleiri HIMARS og nákvæmari skot til Úkraínu

Samúel Karl Ólason skrifar
Úkraínumenn eru sagðir hafa notað þau HIMARS-vopnakerfi sem þeir hafa þegar fengið með mjög góðum árangri á undanförnum dögum.
Úkraínumenn eru sagðir hafa notað þau HIMARS-vopnakerfi sem þeir hafa þegar fengið með mjög góðum árangri á undanförnum dögum. Getty/Anastasia Vlasova

Joe Biden, forseti Bandaríkjanna, hefur ákveðið að senda fleiri vopnakerfi og nákvæm skotfæri til Úkraínu. Bæði er um að ræða eldflaugakerfi af gerðinni HIMARS, sem gera Úkraínumönnum kleift að gera nákvæmar árásir á skotmörk í allt að hundrað kílómetra fjarlægð, og 155 mm skot í fallbyssur sem hægt er að skjóta af mun meiri nákvæmni en hefðbundnum stórskotaliðsskotum.

Varnarmálaráðuneyti Bandaríkjanna tilkynnti vopnasendinguna nú í kvöld. Fjögur eldflaugakerfi verða send til Úkraínu, til viðbótar við þau átta sem þegar er búið að senda. Þá verða þúsund nákvæm skot einnig send.

Samkvæmt frétt Politico skjóta Úkraínumenn um fimm þúsund hefðbundnum skotum úr fallbyssum sínum á dag. Rússar eru sagðir skjóta tvöfalt fleiri skotum. Bandaríkjamenn vonast til þess að með þessum þúsund nýju skotum muni Úkraínumenn geta náð betri árangri með mun færri árásum.

Skotin munu gera Úkraínumönnum kleift að gera mun nákvæmari árásir í átökunum við Rússa og vonast Bandaríkjamenn til að þau muni gefa Úkraínumönnum aukna burði til að draga úr yfirburðum Rússa þegar kemur að stórskotaliði.

Nota HIMARS með góðum árangri

Fram kom á blaðamannafundi í Varnarmálaráðuneyti Bandaríkjanna í dag að rúmlega hundrað úkraínskir hermenn hafi fengið þjálfun í notkun HIMARS-vopnakerfanna.

Fregnir hafa borist af því að Úkraínumenn hafi notað þau átta kerfi sem þeir hafi þegar fengið til að gera árásir á birgðastöðvar og stjórnstöðvar Rússar langt frá víglínum. Úkraínumenn eru sagðir hafa beitt vopnakerfunum með miklum árangri.

Á áðurnefndum blaðamannafundi sögðu Bandaríkjamenn að úkraínskir hermenn væru að koma upp nýjum varnarlínum, eftir fall Luhansk-héraðs og væru að undirbúa varnir Donetsk. Saman mynda héruðin Donbas-svæðið.

Sjá einnig: Lýsa aðstæðum sem „helvíti á jörðu“

Undirbúningur Úkraínumanna var sagður ganga vel, samkvæmt blaðamanni Foreign Policy sem sótti fundinn.

Rússar sagðir skorta baráttuanda

Bandaríkjamenn segja einnig að Rússar eigi í nokkrum vandræðum með baráttuanda hermanna sinna.

„Ég get ekki ímyndað mér að verða fyrir eins miklu mannfalli og Rússar hafa orðið fyrir, og eiga ekki í vandræðum með baráttuanda,“ sagði einn háttsettur embættismaður í Varnarmálaráðuneyti Bandaríkjanna.

Fregnir af manneklu í rússneska hernum hafa borist reglulega á undanförnum vikum. Ráðamenn í Kreml hafa forðast það að lýsa formlega yfir stríði og efna til almennrar herkvaðningar. Þess í staðinn hefur rússneski herinn boðið mönnum fúlgur fjár fyrir herþjónustu. Mun hærri laun en við hefðbundnar kringumstæður og styttri samninga en voru í boði fyrir innrásina í Úkraínu.

Sjá einnig: Alvarlegir gallar á rússneska hernum

Í dag bárust svo fregnir af því að verið væri að bjóða rússneskum föngum með reynslu af herþjónustu að ganga í herinn eða ganga til liðs við málaliðahóp sem nefnist Wagner Group og hefur verið lýst við skuggaher Rússlands.

Michael Kofman, sérfræðingur í málefnum rússneska hersins, segir þetta renna frekari stoðum undir fregnir af mikilli manneklu rússneska hersins.

Úkraína Bandaríkin Rússland Hernaður Innrás Rússa í Úkraínu

Tengdar fréttir

Rússar halda áfram að kenna öðrum um innrásina

Á sama tíma og Rússar leggja undir sig gífurlegar olíu- og gasauðlindir Úkraínu á Donbas svæðinu sem gætu farið langt með að svara orkuþörf Evrópu, halda þeir áfram að kenna Bandaríkjunum og NATO um þeirra eigin innrás í landið.

„Pútín mun ekki gráta það að hann sé farinn“

Rishi Sunak fyrrverandi fjármálaráðherra Bretlands lýsti því yfir í dag að hann sæktist eftir að verða næsti leiðtogi Íhaldsflokksins og þar með forsætisráðherra. Guðlaugur Þór Þórðarson, sem þekkir vel til innan Íhaldsflokksins, telur líklegt að annað hvort Sunak eða Liz Truss utanríkisráðherra hafi sigur í leiðtogakjöri.

Segir Si­evi­eródo­netsk á barmi mannúðar­hörmunga

Ástandið í hinni hersetnu Sievieródonetsk „er á barmi mannúðarhörmunga,“ segir Serhai Haidai, ríkisstjóri Lúhansk í Úkraínu. Hann segir ekkert miðlægt vatnsveitu-, gasveitu- eða rafveitukerfi í borginni, um 80 prósent alls húsnæðis hafi verið eyðilagt og að Rússar fari ránshendi um borgina.

Segir Rússa rétt að byrja í Úkraínu

Vladimír Pútín, forseti Rússlands, segir að Rússar séu að „rétt að byrja“ í Úkraínu. Þetta sagði hann í samtali við rússneska þingmenn í dag og manaði hann einnig Vesturlönd til að reyna að sigra Rússland á vígvellinum.

Vestræn þungavopn loks farin að draga úr mætti Rússa

Forseti Úkraínu segir að langþráð þungavopn frá Vesturlöndum séu loksins farin að skila árangri í baráttunni við rússneska innrásarliðið. Úkraínskar hersveitir sæki fram gegn Rússum í suðurhluta landsins. Hörðustu bardagarnir fari þó fram í austurhlutanum þessa dagana.

Mest lesið


Fleiri fréttir

Sjá meira


×

Mest lesið