„Í jörðu djúpt undir umferðinni bíður ófæddur skógur þögull í þúsund ár“

Erfitt að skilgreina

Björg Örvar hefur sýnt víða og er löngu orðin þekkt fyrir málverk sem erfitt er að skilgreina en tenging við náttúruna, tilfinningar og manneskjuna er augljós í áhrifamiklum verkum hennar. Hún útskrifaðist úr Myndlista- og handíðaskóla Íslands árið 1979 og stundaði síðan listnám við University of California á árunum 1981-1983. Á þessari sýningu má sjá málverk sem listamaðurinn hefur unnið að síðustu árin ásamt nýjum verkum.

Fullkomið samtal við nútímann

Ásdís Þula, eigandi Gallery Þulu, sagði í samtali við blaðamann að verk Bjargar ættu mikinn samastað í samtímanum:

„Þó svo að Björg hafi starfað lengi þá tel ég persónulega að hennar tími sé núna, þar sem abstrakt verk hennar eru í fullkomnu samtali við nútímann með sínar mjúku lífrænu línur og litasamsetningu.“

Kjarni málsins

Halldóra Kristín Thoroddsen, skáld og rithöfundur, skrifaði texta um Björgu og verk hennar sem hljóðar svo:

„Form er innihald, innihald er form. Sem aldrei fyrr lýkst sá sannleikur upp fyrir tímanum. Efnisagnir eru upplýsingar í tómi leitandi að sinni samsvörun. Getum við talað um þrá efnsins? 

Náttúrulífsmálarinn Björg Örvar fjallar um kjarna málsins. Hið smæsta og hið stærsta. Alheim og öreind. Í hugleiðsluástandi skynjum við stundum að innst inni erum við hið sama og umhverfi okkar, örsaga í því heildarverki, byggð því sama efni. Maður, jörð og alheimur eru eitt. 

Það er erfitt að mæla Björgu hillupláss í stefnu­úrvali myndlistarheimsins. Hér dugir engin ættfærsla, til þess er höfundurinn of sérsinna, þó að hann standi föstum fótum í hringiðunni miðri, dorgandi jafnt úr fagurbókmenntum, tónlist, vísindum og sjónrænum listum. Tilraunir hennar minna kannski helst á tilraunir sumra tónlistarmanna þegar þeir fara inn í tóninn og bjaga fram á bjargbrún, til þess að finna mörkun á milli þess að vera tónn eða bara hljóð.“

Sýningin stendur til sjöunda ágúst næstkomandi.