Erilsöm helgi hjá björgunarsveitum: Koma örmagna göngukonu við Kattarhryggi til bjargar

Þetta kemur fram í tilkynningu frá Björgunarsveitunum. Þar segir að sveitir á Suðurlandi hafi verið kallaðar út á sjöunda tímanum í kvöld eftir að konan, sem var á göngu með hópi fólks hafi orðið örmagna og orkulaus. Illa hafi gengið að bjarga henni og því sé beðið hjá henni eftir að þyrla Landhelgisgæslunnar sæki hana.

Mörg verkefni

Sjálfboðaliðar björgunarsveitanna komu ökumönnum fjögurra bíla til aðstoðar sem höfðu fest bíla sína á hálendi og í ám um helgina. „Í Hólmsá á fjallabaki og Þríhyrningsá á Austurlandi höfðu ökumenn fest bíla sína, á Sprengisandsleið var bíll fastur í leðju og björgunarsveitarfólk flutti farþega úr biluðum bíl á Hlöðufellsvegi á Suðurlandi,“ segir í tilkynningu. 

Þá þurfti einnig að aðstoða sjúkraflutningamenn við að flytja slasaða einstaklinga við Svartafoss, Snæfellsjökul og Stórhöfða í Vestamannaeyjum.

Snemma morguns á sunnudegi voru kaldir og hraktir göngumenn sóttir í Kistufellsskála og þeim komið til byggða og eftir hádegi kom björgunarsveitarfólk bónda til aðstoðar við að reka hjörð af nautgripum fyrir Tungufljót.