Úlfarnir ætla ekki að ráða þjálfara fyrr en eftir áramót

Davis tók við sem bráðabirgðastjóri liðsins eftir að Lage var látinn taka poka sinn þann 2. október. Síðan þá hefur Davis stýrt liðinu í þremur leikjum þar sem liðið hefur tapað tveim og unnið einn.

Úlfarnir hafa verið í viðræðum við tvo mögulega arftaka Lage eftir að Portúgalinn var látinn fara, en báðir hafa þeir hafnað starfinu. Félagið ræddi við Julen Lopetegui, fyrrum þjálfara spænska landsliðsins, og nú síðast Michael Beale, núverandi knattspyrnustjóra QPR.

Eftir að hafa fengið nei frá þeim báðum hefur félagið ákveðið að bíða fram á nýtt ár með það að ráða inn nýjan stjóra í starfið.

„Við ætlum okkur ekki að flýta okkur um of í leit okkar að nýjum þjálfara og munum ekki gera neinar málamiðlanir í okkar nálgun á því sem við teljum vera hinn fullkomna einstakling fyrir félagið okkar og liðið hér hjá Wolves,“ sagði Jeff Shi, stjórnarformaður Wolves.

Úlfarnir eiga enn eftir að leika fimm leiki áður en heismeistaramótið í Katar hefst í næsta mánuði, auk þeirra leikja sem fara fram um jólahátíðina í ensku úrvalsdeildinni.