Segir fólk þurfa að eiga það við sína samvisku ef það segir sig úr F.Í.

Mikil ólga hefur ríkt innan Ferðafélagsins frá því að Anna Dóra Sæþórsdóttir, fyrrverandi forseti félagsins, steig fram og sagði af sér eftir að hafa lent upp á kant við aðra stjórnarmenn. Þeim ber ekki saman um hversu stórt vandamál áreitni- og ofbeldismál séu innan félagsins.

Kristín Pálsdóttir hyggst segja sig úr félaginu eftir að vantrauststillögu hennar var vísað frá á félagsfundi í gærkvöldi. Í samtali við fréttastofu sagðist hún hafa orðið þess áskynja að núverandi stjórn tæki áreitnis-og ofbeldismál ekki alvarlega.

„Mér fannst þau gera lítið úr málum að segja það til dæmis að það hefur ekki verið nein nauðgun en áreitni getur haft mikil áhrif á þolendur,“ sagði Kristín í hádegisfréttum Bylgjunnar í gær. Áhyggjur Kristínar voru bornar undir Sigrúnu Valbergsdóttur, forseta Ferðafélagsins.

„Þessi tiltekni félagsmaður hefur í höndum líka gögn frá fráfarandi forseta sem sagði í viðtali í Stundinni 15. nóvember í fyrra að öll þau áreitnismál sem komið hefðu komið til umfjöllunar hefðu verið meðhöndluð samkvæmt verklagsreglum félagsins og væru afgreidd,“ segir Sigrún og bætir við að þannig hefði fráfarandi forseta orðið tvísaga.

Sigrún segist vera afar ánægð með félagsfundinn sem fram fór í gærkvöldi.

„Það voru yfir þrjú hundruð félagar í Ferðafélagi Íslands sem komu á fundinn og við höfum valið það að svara ekki í fjölmiðlum og vera ekki í fjölmiðlaslag eftir að stjórn og framkvæmdastjóri urðu fyrir miklum ávirðingum og við vildum segja okkar félagsmönnum frá því hvernig málin væru vaxin og hvað hefði orðið til þess að ekki náðist samstarf á milli fyrrverandi forseta og stjórnar og framkvæmdastjóra og það var bara mjög ánægjulegt hversu margir félagsmenn komu og vildu heyra þetta frá okkar hlið og þetta var náttúrulega bara opinn félagsfundur og öllum frjálst að tjá sig og mjög einörð afstaða og stuðningur sem stjórn og framkvæmdastjóri fengu á þessum fundi. Það var yfir 90% stuðningur.“

En er ekkert sem stjórn hefði mátt gera öðruvísi? Því nú liggur ljóst fyrir að fjöldi fólks og þá sérstaklega kvenna er ósáttur með farveg mála.

„Stjórn getur alltaf gert betur og samfélagið getur líka alltaf gert betur og stjórn ferðafélagsins undir forystu fyrrverandi forseta sat saman í nokkrar vikur og uppfærði ferla og viðbragðsáætlanir og það var alger samstaða um það. Það hafa engin mál komið upp síðan þetta var ákveðið. Engu að síður er okkur ljóst að jafnvel þessir ferlar og þessi viðbragðsáætlun er nú þegar úrelt og hún verður uppfærð og komi upp fleiri mál þá verður þeim vísað til utanaðkomandi aðila til meðferðar.“

Sigrún segir að það hafi ekki verið ofbeldis- og áreitnismál sem hafi ollið samstarfserfiðleikum fyrrverandi forseta og stjórnarmanna.

„Það var bara stjórnunarstíll og hún náði ekki saman við okkur, fyrir utan það að vilja og ætla frá upphafi að koma framkvæmdastjóranum frá.“

En hún er nú ekki ein til frásagnar um þessi áreitnismál þannig að það er alveg ljóst að þarna hefur eitthvað verið í ólagi?

„En sko 15. nóvember lýsir hún því yfir að þessi mál hafi verið afgreidd samkvæmt ferlum. Eftir það vinnur stjórnin að uppfærslu ferlanna en það koma engin ný mál upp eftir það en síðan segir hún að við höfum ekki viljað vinna að þessum málum. Þetta náttúrulega stenst enga skoðun.“

Sigrún segist ekki vita þess að fólk hafi sagt sig úr félaginu eftir fundinn.

„Fundinum lauk undir miðnætti og við höfum ekki séð það. Fólk verður bara að eiga það við sína samvisku.“