Aur­björg að hluta gerður að á­skriftar­vef

Frá þessu segir í tilkynningu. Þar er haft eftir Jóhannesi Eiríkssyni, framkvæmdastjóra Aurbjargar að með hinni nýju áskriftarleið muni áskrifendum bjóðast víðtækari lausnir við „að taka upplýstar, góðar og skynsamlegar fjárhagslegar ákvarðanir sem gætu mögulega sparað þeim milljónir“.

Ennfremur segir að með áskrift megi finna margþættar lausnir og þjónustu tengda húsnæðislánum, tryggingum, sparnaðarreikningum, kortum, bílalánum og skammtímalánum - til dæmis hvernig finna megi hagstæðustu húsnæðislánin með hlutlausum samanburði og endurfjármagna þau.

Í tilkynningunni segir að áskriftarleiðin muni kosta notendur 1.190 krónur á mánuði.

„Á vefnum er einnig að finna samanburð á verði ýmissa vara og þjónustu, eins og t.d. eldsneyti, síma og neti, bifreiðaskoðun og rafmagni þar sem með einum smelli er hægt að skipta um raforkusala. Starfsmenn Aurbjargar hafa síðustu mánuði verið að þróa og útfæra nýju áskriftarleiðina,“ segir í tilkynningunni.

Aurbjörg er fjártæknivefsíða sem fór í loftið í október 2017, en fjártæknifyrirtækið Two Birds keypti síðuna snemma árs 2020.

Tilgangur vefsíðunnar er sagður vera sá að spara neytendum pening, hjálpa þeim að fræðast um fjármál og finna hagstæðustu kjörin fyrir lán, sparnað, kort og fleira. Samanburðirnir á Aurbjörg.is eru óháðir öðrum fjármálafyrirtækjum og segir að með því sé verið að gæta að hagsmunum neytenda.