Geir segir galið að hafa verið gerður að glæpa­manni

Þetta kemur meðal annars fram í nýju viðtali við Geir en hann var gestur í hlaðvarpi Sölva Tryggvasonar. Þar ræðir Geir meðal annars hrunið og svo Landsdómsmálið sem situr enn í honum. Geir var í kjölfar fjármálahruns 2008 dreginn fyrir Landsdóm og dæmdur þar fyrir að hafa látið fyrir farast að upplýsa samráðherra sína í ríkisstjórn um alvarleika málsins og aðsteðjandi ógn. 

Geir var afar ósáttur við þá niðurstöðu sem og að hafa verið dreginn fyrir Landsdóm þrátt fyrir að hann hafi verið dæmdur án refsingar og að málskostnaður félli á ríkissjóð. Hann vísaði málinu til Mannréttindadómstóls Evrópu en hafði ekki erindi sem erfiði. Strax í kjölfarið sendi Geir frá sér yfirlýsingu þar sem sagði meðal annars: „Sú niðurstaða Landsdóms að sýkna mig af alvarlegustu sökunum sem á mig voru bornar skiptu mestu máli fyrir mig,“ sagði Geir; að hann hafi unnið málið efnislega.

Í samtali við Sölva fer hann nánar í saumana í þessum málum og segir:

„Mér datt aldrei í hug að nokkrum manni dytti í hug að ætla að gera glæpamenn úr 4 fyrrverandi ráðherrum, sem voru allir að reyna að gera sitt besta í gríðarlega erfiðum aðstæðum. 

Ég dreg ekkert fjöður yfir það að eflaust hefur okkur orðið á mistök og mér þá sérstaklega, en að gera mistök á erfiðum tímum er ekki það sama og að fremja glæpsamlegan verknað. Það er gríðarlegur munur á því að vera ósammála tilteknum aðgerðum eða ætla að gera úr því refsivert athæfi. Enda fannst ekkert slíkt þó að það hafi verið farið í gegnum allt hjá mér, alla tölvupósta og fleira.“

Lítið að marka afsökunarbeiðni nema hún sé opinber

Eins og Vísir hefur greint frá sendi Dr. Hannes Hólmsteinn Gissurarson nýlega frá sér mikla bók um Landsdómsmálið en hann hefur lagst í miklar rannsóknir á þessu efni. Niðurstaðan kemur bókarhöfundi ekki á óvart. Geir H. Haarde er saklaus.

,,Ég er ekki endilega sammála öllu sem Hannes Hólmsteinn skrifar í bók sinni um málið sem var að koma út, en bókin er þarft verk og hann hefur augljóslega lagt mikla vinnu í hana,” segir Geir um bókina.

Þá kom það jafnframt nýlega fram að Magnús Orri Schram fyrrverandi þingmaður bað Geir opinberlega afsökunar á að hafa tekið þátt í málinu. Sölvi spyr Geir út í það atriði og Geir segist meta þá afsökunarbeiðni mikils:

,,Mér þótti auðvitað mjög vænt um það, þó að seint væri. En það hafa margir aðrir komið að máli við mig persónulega og beðið mig afsökunar, en þá segi ég að það sé nú lítið að marka það nema það sé gert opinberlega,“ segir Geir. 

Glímdi við krabbamein og Landsdóm

Og bætir við að sá sem í raun hafi gengið myndarlegast fram í því og hafi verið fyrstur manna til að gera það hafi verið Ögmundur Jónasson fyrrverandi ráðherra Vinstri grænna. Hann hafi skrifað greinar þar um í bæði Morgunblaðið og Fréttablaðið.

„Ég held að hann hafi einlæglega séð mikið eftir þessu. Það kom mér mjög á óvart að fólk sem ég taldi mig þekkja vel ákvað að taka þátt í þessari vegferð,” segir Geir, sem segir málið hafa tekið mikið á sig:

,,Ef maður talar um þetta við útlendinga eiga þeir erfitt með að skilja þetta þegar málið er útskýrt. Nafninu mínu hefur oft verið stillt upp við hliðina á þekktu fólki frá öðrum löndum sem hefur gert sig sekt um að misnota aðstöðu sína til að stela úr opinberum sjóðum. 

Ég hef oft heyrt spurninguna: „Hvað stal hann miklu þessi?” um sjálfan mig. Ég var fjármálaráðherra lengur en flestir og ef ég hefði seilst í opinbera sjóði hefði það réttlætt Landsdómsmál. Það fóru góð tvö ár af ævi minni meira og minna í þetta og ég var framan af þeim tíma líka að glíma við krabbamein í vélinda, sem betur fer fór allt saman vel. En auðvitað var þetta allt saman mjög dramatískt.”

Setti tappann í flöskuna í hruninu

Geir segist hafa þurft að hlúa mjög vel að sér til að halda jafnvægi í gegnum hrunið, enda álagið gríðarlegt:

,,Þetta var auðvitað mjög erfitt tímabil og algjörlega ólíkt öllu sem fólk þekkti. En mér tókst að halda ró minni og halda mér í góðu jafnvægi í gegnum allan þennan tíma.“

Og Geir segir frá því að tvennt hafi hann gert til þess meðvitað.

„Ég neitaði mér algjörlega um allt áfengi í nánast heilt ár. Ekki að það hafi ekki verið vandamál, en ég vissi bara að það myndi ekki hjálpa mér. Svo var ég mjög duglegur í ræktinni og mætti alla morgna snemma til að vera kominn sprækur í vinnuna eftir að hafa hreyft mig. Þetta tvennt held ég að hafi hjálpað mér persónulega í þessum aðstæðum og hjálpað mér að takast á við hlutina betur.“

Hélt sig frá samfélagsmiðlum

Þá segist Geir hafa passað sig á því að vera ekkert inni á samfélagsmiðlum þegar sem mest gekk á.

„Í raun hélt ég mig nánast alveg frá þeim fram til 2015. Það er mikilvægt fyrir fólk sem er í opinberum störfum að eyða ekki of miklum tíma á samfélagsmiðlum og ég hugsa að það geti auðveldlega brenglað dómgreindina ef maður fer að liggja yfir því sem fólk skrifar þar,” segir Geir.

Geir hefur ekki veitt mörg viðtöl um þetta mál né önnur eftir að áfallið reið yfir. Hann segist ekki hafa fundið mikla löngun til þess eða að hafa miklar skoðanir opinberlega á undanförnum árum:

,,Ég er hættur í opinberum störfum og þá ber mér engin skylda til að vera að tjá mig opinberlega eða gefa kost á mér í viðtöl. Ég veit að margir fyrrverandi stjórnmálamenn hafa mikla löngun til að hafa sjónarmið og skoðanir á því sem er að gerast í samfélaginu. Auðvitað kemur það fyrir að mig langar að leggja orð í belg, en það er ekki þannig að ég geti ekki látið það eftir mér.”