Góður endur­komu­sigur hjá Kefla­vík en Haukar fóru létt með Breiða­blik

Það voru ekki margir sem áttu von á að Fjölnir myndi ná að stríða Keflavík að ráði í leik liðanna í Subway-deild kvenna í kvöld. Fjölnir var í sjötta sæti deildarinnar með 10 stig fyrir leikinn en Keflavík efstar með 36 stig.

Annað kom hins vegar á daginn. Fjölnir byrjaði leikinn af miklum krafti og náði mest nítján stiga forystu í fyrri hálfleik. Þær leiddu 27-10 eftir fyrsta leikhluta og þó Keflavík hafi aðeins náð að laga stöðuna fyrir hálfleik var staðan þá 50-38 Fjölni í vil.

Í síðari hálfleik sýndi Keflavík hins vegar mátt sinn og megin. Þær minnkuðu muninn jafnt og þétt og komu honum niður í eitt stig fyrir lokafjórðunginn. Þar gekk Fjölni síðan skelfilega að skora, þær náðu aðeins að setja níu stig í leikhlutanum og Keflavík fafnaði tólf stiga sigri að lokum, lokatölur 93-81.

Daniela Wallen skoraði 33 stig fyrir Keflavík í kvöld og tók þar að auki 14 fráköst. Brittany Dinkins var sínu gamla liði erfið, hún skilaði þrefaldri tvennu með 18 stig, 10 fráköst og 11 stoðsendingar. Urte Slavickaite var hins vegar stigahæst hjá Fjölni með 35 stig.

Spennan var öllu minni í Kópavogi þar sem Haukar voru í heimsókn hjá Blikum. Liðin á sitt hvorum endanum í töflunni en Blikar leiddu þó 20-13 að loknum fyrsta leikhluta og staðan í hálfleik var 33-30 Haukum í vil, aðeins þriggja stiga munur og allt galopið.

Í síðari hálfleik skildu þó leiðir. Haukar tvöfölduðu stigafjölda sinn og unnu fjörtíu stiga sigur að endingu, lokatölur 95-55.

Lovísa Björt Henningsdóttir og Sólrún Inga Gísladóttir voru stigahæstar hjá Haukum með 20 stig en Anna Soffía Lárusdóttir skoraði 18 fyrir Breiðablik.