Gamla brýnið Warn­ock hrósaði Jóhanni Berg í há­stert

Warnock sagðist vera hættur í þjálfun eftir að hann yfirgaf Middlesbrough árið 2021. Hann hóf þjálfaraferilinn árið 1980 og hafði stýrt liðum á borð við Sheffield United, Crystal Palace, Queens Park Rangers, Leeds United og Cardiff City.

Hann var svo fenginn til að bjarga Huddersfield frá falli. Sem stendur er liðið í 22. sæti með 31 stig eins og bæði Blackpool og Wigan sem er í sætunum þar fyrir neðan. Öll þrjú liðin eru fjórum stigum frá öruggu sæti.

Huddersfield hafði unnið Birmingham í umferðinni á undan áður en liðið mætti Burnley. Þar sá liðið aldrei til sólar og hrósaði Warnock nokkrum leikmönnum liðsins í hástert. Þar á meðal var Jóhann Berg.

„Ég hef alltaf elskað Guðmundsson, draumur hvers þjálfara. Fær aldrei hrós þó hann sé 8 af 10 í hverri viku. Það kemur fyrir að hann sé 9 (af 10) en aldrei 6 eða 7. Það er það sem þú þarft, slíkir leikmenn eru gríðarlega mikilvægir þegar lið ætlar að fara upp úr ensku B-deildinni. Þú þarft slíka leikmenn og hann er einn af þeim.“

Þá talaði hann um spennandi vængmenn Burnley og að Ashley Barnes væri að spila líkt og brasilíska goðsögnin Pele.

Burnley stefnir hraðbyr á ensku úrvalsdeildina en liðið er á toppi ensku B-deildarinnar með 76 stig að loknum 34 leikjum eða 12 stigum meira en Sheffield United sem er í 2. sætinu og 19 stigum meira en Middlesbrough í 3. sætinu.