Björgvin og Kristján báðir í landsliðinu

Leikirnir eru við Ísrael á útivelli 27. apríl og við Eistland í Laugardalshöll þremur dögum síðar. Ef Ísland vinnur báða leiki endar liðið á toppi síns riðils.

Útlit var fyrir að Björgvin Páll yrði ekki með í leikjunum en hann tilkynnti um það í færslu á Facebook á byrjun mánaðarins að hann ætlaði ekki að gefa kost á sér. 

Sú tilkynning kom í kjölfar þess að Kristján og Björgvin höfðu skipst á að senda út yfirlýsingar, eftir að í ljós kom að Björgvin hefði sent Kristjáni skilaboð í febrúar, degi áður en lið þeirra Valur og PAUC mættust í Evrópudeildinni, sem Kristjáni sárnuðu.

Björgvin sagðist í fyrrnefndri færslu ekki sjá sér fært að spila með leikmanni sem ekki vildi „ræða málin og clear-a þessa hluti“, og vildi hann að fókusinn yrði á landsleikina en ekki mál þeirra Kristjáns.

„Til þess að auðvelda handknattleikssambandinu það verkefni þá hef ég ákveðið að gefa ekki kosta á mér í næsta landsliðsverkefni og hef ég greint landsliðsþjálfurunum frá þeirri ákvörðun minni (að því gefnu að það hefði átt að velja mig í landsliðið á annað borð). Sú ákvörðun er tekinn vegna þess að ég sé ekki fyrir mér að spila með leikmanni sem ekki vill ræða málin og clear-a þessa hluti og finnst ósanngjarnt að setja HSÍ eða þjálfara landsliðsins í þá stöðu að þurfa að velja á milli leikmanna (að því gefnu að þeir hafi hug á því að velja Kristján í landsliðið),“ skrifaði Björgvin.

Þorsteinn Leó nýliði í hópnum

Nú er hins vegar ljóst að Björgvin verður með í leikjunum mikilvægu og að þeir Kristján endurnýja kynnin eftir að hafa síðast leikið saman með landsliðinu á HM í Svíþjóð í janúar.

Kristján er annar af tveimur hægri skyttum í hópnum ásamt Teiti Erni Einarssyni en þeir Ómar Ingi Magnússon og Viggó Kristjánsson, sem spila sömu stöðu, eru báðir meiddir.

Einn nýliði er í íslenska hópnum að þessu sinni, Þorsteinn Leó Gunnarsson, sem staðið hefur sig frábærlega með Aftureldingu í vetur og er þar lærisveinn annars af starfandi landsliðsþjálfurum, Gunnars Magnússonar.

Gunnar og Ágúst Jóhannsson stýra landsliðinu væntanlega í síðasta sinn í leikjunum tveimur áður en nýr landsliðsþjálfari tekur svo við stjórnartaumunum en enn er óvíst hver það verður.

Hópinn sem mætir Ísrael og Eistlandi má sjá hér að neðan.

Markverðir:

Björgvin Páll Gústavsson, Valur (254/21)

Viktor Gísli Hallgrímsson, HBC Nantes (45/1)

Aðrir leikmenn:

Arnar Freyr Arnarsson, MT Melsungen (81/91)

Aron Pálmarsson, Aalborg Håndbold (166/638)

Bjarki Már Elísson, Telekom Veszprém (101/348)

Elliði Snær Viðarsson, Vfl Gummersbach (33/51)

Elvar Ásgeirsson, Ribe Esbjerg (17/19)

Elvar Örn Jónsson, MT Melsungen (62/147)

Gísli Þorgeir Kristjánsson, SC Magdeburg (49/110)

Janus Daði Smárason, Kolstad Håndball (68/104)

Kristján Örn Kristjánsson, Pays d’Aix UC (26/45)

Óðinn Þór Ríkharðsson, Kadetten Schaffhausen (26/85)

Sigvaldi Björn Guðjónsson Kolstad Håndball (59/158)

Stiven Tobar Valencia, Valur (2/2)

Teitur Örn Einarsson, SG Flensburg-Handewitt (33/30)

Ýmir Örn Gíslason, Die Rhein-Neckar Löwen (74/35)

Þorsteinn Leó Gunnarsson, Afturelding (0/0)