Rice bað Ødegaard um að árita treyju fyrir sig

Ødegaard kom Arsenal í 0-2 á 10. mínútu í leiknum á Lundúnaleikvanginum í gær. En annan leikinn í röð mistókst Skyttunum að halda tveggja marka forskoti og Hamrarnir komu til baka og náðu jafntefli, 2-2.

Eftir leikinn birtust myndir af Ødegaard árita treyju sína fyrir Rice. Vel virtist fara á með fyrirliðum liðanna eftir harða baráttu á vellinum.

Stuðningsmenn Arsenal leyfðu sér eflaust að dreyma eftir að hafa séð þessar myndir enda hefur Rice verið orðaður við liðið. Rice er reyndar þekktur fyrir að safna treyjum mótherja sinna og á orðið nokkuð myndarlegt safn af þeim.

Arsenal er með fjögurra stiga forskot á toppi ensku úrvalsdeildarinnar en West Ham er í 15. sæti, fjórum stigum frá fallsæti.