21 ár í fangelsi fyrir að gefa tví­fara sínum eitraða osta­köku

Það var árið 2016 þegar Nasyrova vingaðist við aðra rússneska konu í New York í Bandaríkjunum. Urðu þær góðar vinkonur og þóttu þær afar líkar. Þær töluðu báðar rússnesku, voru með mjög dökkt hár, svipaðan húðlit og svipaðar að stærð.

Nasyrova fór heim til hennar í ágúst það ár og gaf henni ostaköku. Konan át ostakökuna en varð afar veik eftir átið. Daginn eftir kom önnur vinkona hennar í heimsókn og fann hana meðvitundarlausa á gólfinu. Pillum hafði verið dreift í kringum hana til þess að reyna að láta líta út fyrir að hún hafi svipt sig lífi. 

Þegar hún kom aftur heim af spítalanum kom í ljós að búið var að stela vegabréfi hennar og fleiri skilríkjum. Þá hafði öllum verðmætum verið stolið .

Lögreglan skoðaði kökuna og fundu phenazepam í henni. Nasyrova var dæmd fyrir líkamsárás, ólögmæta frelsissviptingu og þjófnað. Þarf hún að dúsa í fangelsi þar til hún verður 68 ára gömul, í 21 ár.