Kom sinni heitt­elskuðu á ó­vart með Frikka Dór

Ingi Torfi og Linda Rakel létu pússa sig saman á laugardaginn í veislu sem gestir eiga eftir að minnast lengi. Hjónin nýbökuðu hafa vakið athygli fyrir að hjálpa fólki að ná tökum á mataræði sínu en aðferðin byggir á því að vigta og skrá allt ofan í sig.

Í veislunni voru bæði fjölskylda, vinir og svo stjörnur í mikilvægum hlutverkum. Greta Salóme spilaði á fiðlua og dætur þeirra hjóna sungu fallega Bubbalagið „Trúir þú á engla“ við undirspil Inga Torfa sem sjálfur bjó sig undir að syngja lag úr smiðju Frikka Dórs.

Allt ætlaði um koll að keyra þegar hann spurði hvort það væri ekki bara best að Frikki Dór sjálfur tæki lagið. Þá var hafnfirska sjarmatröllið mætt með flugi norður, með gítarinn og keyrði upp stemmninguna.

Linda Rakel upplýsir á Instagram að hún hafi reynt allt hvað hún gat til að fá Inga Torfa til að bóka Frikka Dór í brúðkaupið. Hann hafi hins vegar ekki tekið vel í þá beiðni. Kappinn var greinilega með önnur plön, að koma sinni heittelskuðu á óvart.

Inga og Linda voru viðmælendur í Íslandi í dag fyrir tæpum tveimur árum.