Óðinn Þór öflugur í mara­þon­leik

Alls voru 99 mörk skoruð í sannkölluðum maraþonleik Kadetten Schaffhausen og Kriens í einvígi liðanna um svissneska meistaratitilinn í handknattleik. Óðinn Þór Ríkharðsson leikur með Schaffhausen og Aðalsteinn Eyjólfsson er þjálfari liðsins.

Fyrir leikinn í dag var Schaffhausen með 2-0 forystu í einvígi liðanna og gat því tryggt sér meistaratitilinn með sigri í dag. Lengi vel virtust þeir líklegir til þess því liðið var með fimm marka forskot í seinni hálfleiknum.

Heimaliðið var þó sterkt á lokamínútum venjulegs leiktíma, skoraði sjö af síðustu níu mörkum leiksins og knúði fram framlengingu, staðan í leikslok 29-29. 

Eftir fyrri framlengingu var staðan 35-35 og enn var jafnt eftir framlenginu númer tvö, staðan 42-42 og því ekkert annað eftir en vítakastkeppni. Þar náðist loksins að fá fram sigurvegara. Heimalið Kriens hafði betur, vann 50-49 sigur og er því enn á lífi í einvíginu. 

Óðinn Þór skoraði átta mörk í leiknum auk þess að skora í tvígang í vítakeppninni. Liðin mætast næst á heimavelli Schaffhausen á fimmtudag.