Kennara­sam­bandið kveður Kennara­húsið

Kennarar munu kveðja húsið við hátíðlega athöfn klukkan 15 í dag, að Katrínu Jakobsdóttur forsætisráðherra viðstaddri.

Í tilkynningu frá Kennarasambandinu segir að sambandið hafi haft aðsetur í húsinu í nærri þrjátíu ár en flutti starfsemi sína í Borgartún árið 2020. Við skilin ljúki merkum kafla í sögu kennaramenntunar og samtaka kennara. 

„Kennarahúsið var reist á 600 ferfaðma lóð sunnan í Skólavörðuhæð og austan Laufásvegar árið 1908. Þá um haustið tók Kennaraskóli Íslands formlega til starfa í húsinu.

Árið 1989, í tilefni af því að 100 ár voru liðin frá stofnun fyrsta kennarafélagsins, gaf ríkið Kennarasambandinu húsið, sem var þá illa farið að utan sem innan. Eftir heilmiklar endurbætur á húsinu hófst starfsemi kennarasamtakanna í húsinu árið 1991. Þá voru félagsmenn um 3.500 en þegar starfseminni lauk í húsinu árið 2020 voru þeir nærfellt 11 þúsund og því tímabært að flytja í stærra húsnæði.

Á áttunda þingi KÍ 2022 var ákveðið að skila húsinu, en kennarahúsið var gefið KÍ með þeim kvöðum að sambandið hefði yfirráð yfir húsinu en gæti ekki selt það eða leigt út. Við skilin fær sambandið til baka fjármuni sem það lagði í endurbætur í gegnum árin.

Kennarasamband Íslands kveður nú Kennarahúsið við Laufásveg sem á sérstakan stað í hjörtum fjölmargra félagsmanna. Það er von KÍ að húsinu verði fundið verðugt hlutverk í framtíðinni,“ segir í tilkynningunni.