6.563 fiskar veiðst í Veiðivötnum

Mokveiði er eina orðið sem kemur upp í hugann eftir samtöl við veiðimenn og veiðikonur sem hafa verið upp í Veiðivötnum frá opnun. Dagsveiðin hefur verið 10-20 fiskar hjá mörgum og einstaka veiðifólk hefur verið að gera enn betur en það. Það er reglulega gaman að heyra af góðum aflabrögðum úr vötnunum sem er ein mest sótta veiðiperla landsins og það er ekkert skrítið því að veiða innan um stórbrotið landslag á góðum degi í Veiðivötnum er eitthvað sem enginn gleymir. 

Þegar lauslega er rýnt í tölurnar kemur ekkert á óvart að sjá að veiðin í Litlasjó er mest enda vatnið mikið stundað, þar hafa veiðst 1.283 fiskar og sá stærsti 4,2 kíló eða rétt um níu pund.  Ónýtavatn er næst með 541 fisk á land og þriðja vatnið á listanum eru Hraunvötn með 385 fiska á land og þar af einn 4,6 kílóa fisk sem okkur sýnist vera sá stærsti úr vötnunum í sumar. Veiðitölur úr Veiðivötnum 2023 er að finna á heimasíðu vatnana og þú getur skoðað með að smella HÉR.