Vísir greindi frá því síðastliðinn mánudag að Sverrir Þór hefði verið ákærður af ríkissaksóknara í Brasilíu fyrir stórfelld fíkniefnalagabrot og skipulagða glæpastarfsemi.
Þann 3. júlí síðastliðinn var fyrirtaka í málinu hjá dómstól í Rio de Janeiro þar sem sönnunargögn voru lögð fyrir dóminn og vitnaleiðslur fóru fram.
Sagðist vera tónlistarmaður
Við yfirheyrslur hjá lögreglu þann 12. apríl síðastliðinn kvaðst Sverrir Þór eiga þrjú börn. Aldur eins barnsins er tilgreindur í skýrslum lögreglu en barnið er ýmist skráð tíu eða tólf ára. Aðspurður um atvinnu kvaðst hann vera tónlistarmaður og sagðist hafa starfað sem slíkur undanfarin þrjátíu ár. Þá sagði hann að barnsmóðir sín væri „viðskiptakona“. Fastar tekjur hans á mánuði næmu fimm þúsund brasilískum ríölum, sem jafngildir tæpum 140 þúsund íslenskum krónum.
Þá sagðist hann ekki hafa neinar aðrar tekjur þar fyrir utan. Aðspurður um sjúkdóma kvaðst hann þjást af bronkítis sem valdi hósta og öndunarerfiðleikum. Fram kemur í yfirheyrsluskýrslunni að Sverrir hafi verið „eðlilegur og rólegur“ við yfirheyrsluna. Í annarri skýrslu lögreglu frá 12. apríl kemur fram að barnsmóðir Sverris Þórs hafi einnig verið handtekin.
Sverrir Þór var úrskurðaður í gæsluvarðhald 14. apríl síðastliðinn. Fram kemur í dómsskýrslu að þegar Sverrir Þór hafi mætt fyrir dóminn hafi hann í upphafi verið spurður út í persónulega hagi sína. Kvaðst hann vera einhleypur og sagðist vera tónlistarmaður að atvinnu. Aðspurður um hvort hann væri háður einhverjum efnum nefndi hann hass og kókaín. Þá sagðist hann jafnframt tala og skilja portúgölsku.
Sé óttalaus gagnvart yfirvöldum
Fram kemur í úrskurði dómara að Sverrir Þór hafi með broti sínu rofið skilorð, sem endurspegli óttaleysi hans gagnvart yfirvöldum og sýni fram fram á að hann sé ekki reiðubúinn að snúa til baka í samfélagið. Því sé gæsluvarðhald nauðsynlegt.
Í gögnum saksóknaraembættisins kemur fram að við handtökuna á heimili Sverris Þórs þann 12. apríl hafi lögregla fundið tæp 150 grömm af maríjúana og tæp 4 grömm af kókaíni. Í greinargerð sem lögfræðingur Sverris Þórs lagði fyrir dóminn í maí síðastliðnum er því haldið fram að umrædd efni hafi verið til einkanota en ekki ætluð til sölu og dreifingar.
Sem stendur er Sverrir Þór vistaður í José Frederico Marques – gæsluvarðhaldsfangelsi í norðurhluta Rio de Janeiro.
Var aðalskotmarkið
Sverrir Þór hefur lengi verið bendlaður við fíkniefnamál hér á landi sem teygja anga sína til Evrópu og Suður- Ameríku. Hann hefur verið til rannsóknar hjá alríkislögreglunni í Santa Carina-ríki undanfarin þrjú ár og er lögreglan ytra sögð búa yfir miklu magni af upplýsingum varðandi fíkniefnaviðskipti hans undanfarin þrettán ár. Um er að ræða umsvifamikla brotastarfsemi. Enda var Sverrir Þór aðalskotmark Match Point aðgerðarinnar þann 12. apríl síðastliðinn, þar sem hann var handtekinn ásamt 32 öðrum sem grunaðir eru um að tengjast starfsemi glæpasamtakanna.
Hann er nú grunaður um að vera leiðtogi annars tveggja smyglhringja sem lagt hafa stund á fíkniefnasmygl og peningaþvætti og hafa mesta starfsemi í borgunum Rio de Janeiro, Rio de Janeiro do Norte og Sao Paulo.
Fíkniefnahringirnir eru taldir hafa smyglað hassi, maríjúana og kókaínitil og frá Evrópu. til Afríku og annarra landa í Suður Ameríku. Bæði er um ræða stór smygl þar sem sendingar eru ferjaðar með flugvélum eða skipum, og minni smygl, þar sem notast er við burðardýr.
Seglbátar notaðir við flutning
Greint hefur verið frá því í brasilískum miðlum að seglbátar hafi verið notaðir til þess að flytja efni yfir Atlantshafið. Talið er að móttöku og sendingarstaðurinn í Brasilíu hafi verið í norð-austurhluta landsins. Efnin voru flutt milli Brasilíu og Evrópu, en einnig til og frá vesturströnd Afríku og Úrúgvæ.
Fram hefur komið að hringirnir séu umsvifamiklir á fasteignamarkaðnum og hafi keypt fasteignir og staðið í framkvæmdum í þeim tilgangi að þvætta illa fengið fé. Þess ber að geta að húsið í suðurhluta Rio,þar sem Sverrir var handtekinn þann 12.apríl, var á byggingarstigi.
Þá hafa hringirnir tengsl við tvö alræmd og rótgróin glæpasamtök í fangelsum: PCC og Comando Vermehlo.
