Hitnar í kolunum hjá Shakiru og Jimmy Butler

Ýmislegt hefur gengið á í ástarmálum söngkonunnar frá því að leiðir hennar og knattspyrnumannsins Gerard Piqué skildu. Þau skildu á síðasta ári eftir ellefu ára samband þegar upp komst um meint framhjáhald hans. 

Í síðasta mánuði var greint frá því að sést hafi til Shakiru og ökuþórsins Lewis Hamilton á snekkju í Miami og að spóka sig í Madrid, höfuðborg Spánar.

Nú virðist söngkonan hafa fundið sér enn annan elskhuga í körfuboltamanninum Jimmy Butler, sem hefur farið á kostum í liði Miami Heat í bandarísku NBA-deildinni í körfubolta undanfarin leiktímabil.

Slúðurmiðlar greina frá því að sést hafi til þeirra yfirgefa veitingastað í London á svipuðum tíma, þó í sitthvoru lagi. Öryggisvörður Butler hafi meira að segja hjálpað Shakiru inn í bíl hennar. Þá hafi sést til þeirra inni á staðnum, þar sem þau gæddu sér á sushi og kokteilum.

Þau hafa fylgt hvoru öðru á samfélagsmiðlinum Instagram frá því í júní á þessu ári en þetta er í fyrsta sinn sem það sést til þeirra opinberlega.