Sjálfið okkar: Í nýju starfi með magahnút og kvíða

Oftast getum við brosað til baka og kinkað kolli áreynslulaust þegar að við erum í nýju starfi og vinir og vandamenn ausa yfir okkur hamingjuóskum.

En þetta er ekki alltaf.

Því í sumum tilfellum getur það gerst að magahnúturinn sem fylgir því að byrja í nýju starfi hverfur ekki. Heldur þróast upp í kvíða.

Einkennin geta verið þau að við erum að upplifa vanlíðan líkamlega og andlega, lendum oft í því að hjartslátturinn verður ör og tilfinningar um að við séum ekki að ráða við nýja starfið eða verðum óörugg aukast.

Í ofanálag fáum við hálfgert samviskubit yfir því að líða svona því að í nýju vinnunni eru allir að taka okkur svo vel og boðnir og búnir til að leiðbeina okkur og kenna ef eitthvað er.

Eða að starfið er nýtt stjórnunarstarf og þú þorir ekki að biðja of mikið um aðstoð, af ótta við að þá komist upp um óöryggið og vanlíðanina sem þú ert að upplifa.

Það sem er gott að gera í þessum aðstæðum er til dæmis að:

• Ofhugsa ekki
• Ekki bera þig saman við fólk sem hefur unnið á þessum vinnustað lengi
• Gerðu eitthvað sem gleður utan vinnu, til dæmis er gott að leggja áherslu á að njóta þess að vera með góðum vinum og fjölskyldu. Vera meðvituð um að við séum að byggja okkur upp
• Gera öndunaræfingar eða fara í hugleiðslu, fara með möntrur eða grípa í það sem við höfum lært um núvitund og svo framvegis. Því að nú er akkúrat rétti tíminn til að grípa í öll verkfærin sem við höfum í farteskinu til að hjálpa okkur að hugsa jákvætt
• Glósaðu í nýju vinnunni og nýttu þær aðferðir sem þú veist að nýtast þér vel þegar þú ert að læra eitthvað nýtt
• Reyndu líka að punkta niður hvað mögulega í nýju vinnunni, eykur á kvíðatilfinninguna. Með því að átta sig á triggerum er auðveldara fyrir okkur að vinna að lausnum
• Fylgstu með nýju vinnufélögunum og lærðu af þeim
• Ef vinnan þín er þannig að þú getur gert vinnustöðina þína persónlega, þá gæti það hjálpað.

Það er síðan alltaf gott að leita í stuðning ef maður er að kljást við kvíða sem verður of mikill eða viðvarandi. Það getur verið maki, besti vinur eða vinkona því oft hjálpar að heyra sjónarmið annarra og okkar nánasta fólk er líka fljótt að benda okkur á styrkleikana okkar.

Þá er mikilvægt að leggja sig fram við að kynnast nýju vinnufélögunum, eiga í samskiptum til dæmis í pásum eða í hádegi og svo framvegis. Að eiga vin í vinnunni er af hinu góða.

Ef mjög langur tími líður og þér finnst þú enn í þeirri stöðu að upplifa kvíða alla daga, er rétt að leita til heimilislæknis eða annars fagaðila.

Ágætis ráð og ýmsan fróðleik um kvíða sem fylgir nýju starfi má lesa um á ensku HÉR.