Undarlegt æði skekur TikTok: „Mmm ísinn svo góður“

Konan sem um ræðir heitir Fedha Simon og er 27 ára Kanadabúi sem gengur undir nafninu Pinkydoll á TikTok. Klippur af henni hafa farið eins og eldur í sinu um samfélagsmiðla undanfarna daga.

Simon starfaði sem súludansmær og rak ræstingarfyrirtæki sem fór á hausinn áður en hún ákvað að reyna fyrir sér á TikTok fyrr á árinu. Nú er hún komin með rúmlega 700 þúsund fylgjendur á TikTok og stefnir hraðbyri á heimsfrægð.

Simon streymir reglulega í beinni, oft í rúmlega klukkutíma í senn, og fylgjast mörg þúsund manns með henni. Að sögn Simon græðir hún á bilinu tvö til þrjú þúsund Bandaríkjadali (um 250 til 400 þúsund íslenskra króna) fyrir hvert streymi.

Þá segir Simon að á öllum miðlum sínum, sem ná einnig til Instagram og OnlyFans, græði hún sjö þúsund Bandaríkjadali á dag.

Herma eftir endurtekningarsömum tölvuleikjakarakterum

Klippurnar eru teknar úr svokölluðum beinum NPC-straumum (e. NPC-livestreams) en það er nýjasta trendið sem tröllríður TikTok þessa dagana. Hugtakið „NPC“ kemur úr heimi tölvuleikja og stendur fyrir „Non-playable character“ eða karakter sem er ekki hægt að stýra. 

Slíkir karakterar eru hannaðir til að glæða tölvuleikjaheima lífi og gefa tölvuleikjaspilurum einhvern til að eiga í samskiptum við. Þeir eru því tölvustýrðir og takmarkaðir og endurtaka gjarnan sömu romsuna.

Notendur TikTok apa endurtekningar og stjórnleysi þessara karaktera í NPC-útsendingunum. Áhorfendur gefa „gjafir“ sem birtast á skjánum sem teiknimyndatákn, t.d. ís í brauðformi, og bregst notandinn við með viðeigandi frasa sem í tilfelli Pinkydoll er „mmm ísinn svo góður.“

Óútskýranlegar vinsældir

Það er ekki ljóst hvað veldur því að þessi streymi eru svona vinsæl. Einhverjir telja að áhorfendur fái kynferðislega örvun af því að geta stjórnað því sem einhver annar segir. Öðrum finnst þetta eflaust svo áhugavert að þeir geta ekki slitið augun frá streyminu.

Carly Kocurek, prófessor í tölvuleikjahönnun og tilraunamiðlun við Illinois Institute of Technology, sagði í viðtali við New York Times að NPC-streymi væru í raun framlenging af svokölluðu „cosplay“ þar sem fólk klæðir sig í búninga og gengur í hlutverk annarra.

Netverjar hafa undanfarið gert mikið grín að NPC-trendi TikTok og meðal annars sett það í samhengi við Barbenheimer, bíótvennuna sem sló í gegn um helgina.

Eric Zhu nokkur deildi myndinni hér að ofan á Twitter á laugardag. Á henni er hann að horfa á streymi Pinkydoll í bíósal á meðan kvikmyndin Oppenheimer spilast í bakgrunni.

Vinsæli TikTok-notandinn Kai Cenat tók líka þátt í NPC-trendinu og greindi síðan frá því að hann hefði grætt sex þúsund Bandaríkjadali (tæplega 700 þúsund íslenskra króna) á aðeins klukkutíma.

Skuggalegar hliðar NPC-streymanna hafa þó líka komið í ljós undanfarið. Klippa af beinni útsendingu TikTok-notandans Driii er komin með 32 milljónir áhorfa á Twitter. Í myndbandinu má sjá hann endurtaka furðulega frasa og tjá kynferðislegar athafnir með látbragði á meðan móðir hans reynir að stöðva hann.