Braut sér leið út úr klefa eftir að hafa verið rænt

Negasi Zuberi, karlmaður á þrítugsaldri, þóttist vera lögreglumaður þegar hann rændi konunni í Seattle fyrir þremur vikum. Eftir að hafa bundið konuna á höndum og fótum flutti hann hana að heimili sínu í borginni Klamath Falls í Oregon-ríki, sem er í mörg hundruð kílómetra fjarlægð frá Seattle.

Hann er sagður hafa stöðvað á leiðinni til þess að brjóta kynferðislega á konunni.

„Þessari konu var rænt, nauðgað og hún læst inni í klefa úr múrsteinum. Lögreglan segir að hún hafi barið veggi klefans með berum höndum þar til að fór að blæða úr höndum hennar. Snögg viðbrögð hennar og lífsvilji gætu hafa bjargað örðum konum frá sambærilegri martröð,“ segir Stephanie Shark, aðstoðaryfirlögregluþjón alríkislögreglunnar í Portland, í fréttatilkynningu.

Hafði gert gátlista fyrir mannrán

Í frétt AP segir að konunni hafi tekist að brjótast úr úr klefanum og þaðan inn í bíl Zuberis þar sem hún náði byssu hans. Þá hafi hún yfirgefið heimili hans alblóðug og náð athygli vegfaranda, sem hringdi á lögreglu.

Zuberi var handtekinn daginn, þann 16. júlí síðastliðinn, á bílaplani við stórverslun í borginni Reno í Nevada. Hann var þar ásamt konu sinni og ungu barni. Við leit á heimili fjölskyldunnar fundust handskrifuð skjöl þar sem Zuberi hafi skrásett einhvers konar áætlun. 

Meðal þess sem hann skrifaði hjá sér var að muna að sjá til þess að konur sem hann rændi ættu ekki fjölskyldur.

Hann hefur verið ákærður mannrán og að hafa flutt konuna milli ríkja með það í huga að brjóta kynferðislega á henni. Hann gæti átt yfir höfði sér lífstíðarfangelsi vegna brota sinna. Þá er hann grunaður um að hafa brotið gegn minnst fjórum konum með sambærilegum hætti.