„Það má alveg segja að við höfum verið veru­lega ó­heppin“

Fyrir það hafði hitabylgja, úrhellisrigning, skordýrabit og skipulagsleysi sett svip sinn á mótið. Um fimmtíu þúsund skátar víðs vegar að úr heiminum mættu á mótið og þeirra á meðal var 140 manna hópur frá Íslandi. 

Mótið átti að fara fram 1. til 12. ágúst en nú er ljóst að vegna veðurs mun því ljúka fyrr. Búist er við því að fellibylurinn Khanun gangi yfir svæðið á fimmtudag. Hann gekk yfir Japan í síðustu viku og olli þremur dauðsföllum og gríðarlegum skemmdum.

„Það má alveg segja að við höfum verið verulega óheppin,“ segir Guðjón Rúnar Sveinsson, fararstjóri íslenska hópsins.

„Það var náttúrulega þessi hitabylgja sem tók við okkur fyrst, og mótshaldarar voru kannski ekki alveg búnir að undirbúa nægilega vel mótssvæðið og aðgerðir gagnvart henni. Hvað þá bara svona eðlileg skipulagsmál eins og við eigum að venjast á þessum mótum.“

Þó hafi verið bætt úr skipulagsmálunum og gærdagurinn hafi verið vel heppnaður sem og fyrri hluti dagsins í dag.

„Þangað til að fréttir skullu á að það ætti að fara rýma svæðið. Þá tók næsta verkefni við, að pakka saman,“ segir Guðjón sem tekur fram að þrátt fyrir fréttirnar sé fólk rólegt.

„Það er ekkert panik ástand, alls ekki. Menn eru bara að pakka saman og gera sér grein fyrir því hvernig staðan er. Það er matartorg hérna sem er ekki einusinni búið að taka niður. En menn eru að undirbúa sig jafnt og þétt.“

Hlakkar til að komast heim

Nokkrir úr íslenska hópnum þurftu að leita sér læknisaðstoðar fyrstu dagana vegna hita og skordýrabita en Guðjón segir að síðustu tveir dagar hafi verið auðveldari. Ýmislegt spili þar inn í.

„Það er búið að byggja skýli fyrir þátttakendur til að skýla þeim fyrir hitanum. Svo er búið að vera að dæla út klaka, íspinnum og drykkjarvörum í þátttakendur og alla aðra. Og svo náttúrulega venjumst við hitanum en rakinn hér er gífurlegur sem bætir svolítið mikið í erfiðleikana.“

Einhverjir séu svekktir yfir því að þurfa að yfirgefa svæðið nú þegar mótið sé loks almennilega að byrja.

„En þetta er bara næstum eins og íslenskt skátamót, nema akkúrat í hina áttina, við fáum snjó og slyddu, rigningu, sól og allan pakkann þar. Þannig við kunnum alveg að bregðast við mismunandi aðstæðum á stuttum tíma,“ segir Guðjón.

Nú tekur við ferðalag til Seoul þar sem íslenski hópurinn mun dvelja í nokkra daga áður hann heldur heim til Íslands. Guðjón segir að vissulega sé farið að örla á tilhlökkun yfir því að komast heim.

„Menn eru orðnir verulega þreyttir, það vantar ekki. Það styttist alltaf í að maður vilji komast í sitt eigið rúm.“

Hér fyrir neðan má sjá viðtal fréttastofu við Guðjón frá því í fyrradag.