Hætta við að fá Paqueta eftir á­sakanir um brot á veð­mála­reglum

City og West Ham höfðu komist að samkomulagi um að Englandsmeistararnir myndu kaupa leikmanninn á 80 milljónir punda, sem samsvarar um 13,5 milljörðum króna.

Eftir að tilkynnt var um að leikmaðurinn sæti rannsókn fyrir brot á veðmálareglum ensku úrvalsdeildarinnar er nú orðið ljóst að ekkert verður af vistaskiptum Brasilíumannsins.

Heimildarmenn Sky Sports segja þó frá því að enn sé möguleiki á því að Paqueta færi sig frá West Ham yfir til City þegar félagsskiptaglugginn opnar á nýjan leik í janúar á næsta ári.

Samkvæmt fréttamiðlum í Englandi, þar á meðal Sky Sports, ku Paquetá hafa brotið veðmálareglur er hann lék enn í heimalandi sínu Brasilíu. Leikmaðurinn neitar sök.

Rannsóknin hófst hins vegar þegar óvenju margir veðjuðu á það að Paqueta myndi fá gult spjald í viðureign West Ham og Aston Villa í mars á þessu ári. Leikmaðurinn nældi sér einmitt í spjald í þeim leik er hann braut á John McGinn á 70. mínútu leiksins.