Fer nýjar leiðir í myndlistinni samhliða glænýju föðurhlutverki

Hrifinn af húsvarðarstarfinu

„Ég er í raun að nota alls konar verkfæri sem húsverðir nota við sýninguna. Ég er með kústa og fægiskóflur, sópa og alls konar dót og þaðan kom í raun titillinn, Húsvörður.“

Hann segist alltaf hafa verið hrifinn af húsvarðar starfinu og útiloki ekki að enda þar síðustu árin fyrir eftirlaun.

„Að rölta gangana og passa að allir séu góðir og skipta um skrúfur og ljósaperur. Ég mun auðvitað alltaf vera með vinnustofu í gegnum lífið mitt en það væri alveg stemning að breyta til. Hver veit!“

Vill vera myndlistarmaður, ekki framleiðandi

Árni Már hefur vakið mikla athygli í myndlistarheiminum fyrir ölduseríur sínar en er nú með splunkuný verk þar sem hann fer nýjar leiðir.

„Þessi sería var unnin sérstaklega fyrir Mokka og þetta er svona áframhald og þróun á þessum verkum síðustu ár. Ég kalla þessi verk Afbrigði og þau eru í raun tilraunir af vinnustofunni minni. Öldurnar hjá mér gengu svo ótrúlega vel og seldust stöðugt upp en þá er svo mikilvægt að halda áfram að ögra sér. 

Það var kominn tími fyrir mig persónulega til að þróast og gera eitthvað meira og annað. Maður þarf stöðugt að vera tilbúinn til að þróast, annars hefði ég í raun hætt að verða myndlistarmaður og bara orðið framleiðandi á því sama.“

Nýbakaður faðir og fer aftur í ræturnar

Hann segir þó að það sé ekki alltaf auðvelt að breyta til.

„Auðvitað var auðvelt að festast í því sama þar sem serían seldist upp, ég tala nú ekki um þegar maður er að takast á við nýtt hlutverk sem pabbi,“ segir Árni en hann og Sigrún Karlsdóttir sambýliskona hans eignuðust frumburð sinn Una Árnason í apríl síðastliðnum.

„Það er þó svo miklu skemmtilegra að gera eitthvað nýtt og prófa sig áfram. Ég er líka kominn aftur í spreybrúsann, aftur til rótanna má segja, en ég byrjaði mína vegferð í listsköpun sem unglingur að gera veggjalist.“

Nýju verk Árna, Afbrigði, hafa fengið góðar viðtökur og selst vel að hans sögn.

„Ég held að svo lengi sem þú ert sannur því sem þú ert að gera og vandar til verka þá gengur vel. Það hefur allavega sýnt sig síðustu ár hjá mér.“

Goðsagnakenndur sýningarstaður ýmissa kempa

Árni segir það mikinn heiður að fá að sýna á kaffihúsinu Mokka á Skólavörðustíg en Mokka hefur í áraraðir sett um sýningar eftir marga listamenn sem hafa skrifað sig í sögubækurnar.

„Ég fékk símtal frá þeim þar sem þau buðu mér að vera með sýningu þarna og ég sagði strax já. Þetta er goðsagnakenndur staður sem hefur verið í virku sýningarhaldi í 65 ár. Ég held að þetta sé með lengst starfandi sýningarsölunum í Reykjavík. 

Þetta er að sjálfsögðu líka kaffihús en þarna hafa rosa margar kempur sýnt í gegnum tíðina og bóhem skáld og listamenn voru tíðir gestir. Það er gaman að haka í það að hafa tekið þátt í því ævintýri sem Mokka er.“

Hann segir einnig að það sé fallegt að sjá að staðurinn helst alltaf inni í fjölskyldunni sem stofnaði hann.

„Ég fór og hitti manninn sem sér um sýningarhaldið hjá þeim og það er tengdasonur fólksins sem stofnaði þetta á sínum tíma. Það er svo magnað.“

Sýningin stendur til 22. nóvember næstkomandi. Hún opnar á fimmtudaginn 21. september frá klukkan 16:00 - 18:00 og eru öll velkomin.

Árni Már rekur einnig Gallery Port á Laugavegi. Hann var viðmælandi í þættinum Kúnst í seríu tvö en viðtalið má sjá í spilaranum hér að neðan: