Skriðuhætta eykst samhliða mikilli úrkomu

Í færslu Veðurstofunnar segir að gert sé ráð fyrir mikilli úrkomu á norðan og austanverðu landinu.

„Gert er ráð fyrir mikilli uppsafnaðri úrkomu á Flateyjarskaga, Tröllaskaga og á Ströndum fram á miðvikudag. Hitastig á láglendi er 5-8°C og því gæti slyddað í efstu fjallatoppa. Veður fer kólnandi og á miðvikudag má búast við slyddu og jafnvel snjókomu Norðanlands,“ segir á vef Veðurstofunnar.

Því sé rétt að vara við mikilli úrkomu á þessum svæðum þar sem búast megi við því að skriðuhætta geti aukist fram á miðvikudag en hitastig mun hafa þar mikil áhrif. 

„Minni skriðuhætta skapast ef hitastig verður nálægt frostmarki á miðvikudag.“