Lærði mikilvægi samskipta á kassanum í Bónus

Hér má sjá viðtalið við Tönju í heild sinni:

Öll tengslin verðmæt

Aðspurð hvaða ráð hún myndi gefa fjórtán ára sér svarar Tanja Ýr:

„Þegar ég var fjórtán ára verð ég að viðurkenna að mér var alveg sama og ég var ekkert að pæla. En núna þegar ég lít til baka þá sé ég að öll tengsl sem ég hef myndað eru svo verðmæt.“

Tanja Ýr vann í Bónus sem unglingur og segist hafa lært margt og mikið þar.

„Það er svo mikilvægt að passa að koma vel fram og leggja sig allan fram hvort það sé í vinnu eða við fjölskyldu eða hvað. Því þú veist aldrei hvenær á lífsleiðinni þú gætir þurft að koma til viðkomandi og biðja um hjálp eða hvort þú ert að fara að starfa með viðkomandi aftur. 

Það er svona besta ráð sem ég get gefið sjálfri mér og öðrum. Að passa frá því maður er ungur hvernig maður kemur fram.“

Elskaði að vinna í Bónus

Tanja stofnaði áhrifavaldafyrirtækið Eylenda á sínum tíma og segist þá meðal annars hafa farið og rætt við Bónus um samvinnu.

„Þannig að það kom sér vel fyrir að ég hafði verið að vinna í Bónus áður,“ segir Tanja og bætir við að hún hafi alltaf lagt upp úr því að enda hluti á góðum nótum og átt í góðum samskiptum við samstarfsfólk.

„Ég elskaði að vinna í Bónus, þetta var með fyrstu vinnunum mínum. Ég man að ég byrjaði að töluvert ung að vinna þar yfir sumarið og þegar ég var aðeins eldri langaði mig svo aftur að fara í Bónus frekar en að vinna einhvers staðar annars staðar. Ég elskaði að vera á kassanum, til dæmis þegar eldra fólk kom með rútum að versla á morgnana þá dýrkaði ég að geta aðstoðað það við að setja í körfuna.

Hvernig maður kemur fram skiptir svo miklu máli. Það er númer eitt tvö og þrjú hjá mér og það hjálpar mjög mikið í framtíðinni.“

Á slúðursíðum sem unglingur

Það má segja að Tanja Ýr hafi byrjað samfélagsmiðlaferil sinn á bloggsíðunni fólk.is sem naut mikilla vinsælda hér áður fyrr. Hún var dugleg að setja myndir þangað inn og áttaði sig á því hvernig hún gæti breytt texta myndanna þannig að þær kæmu upp á leitarvefnum google.

„Þetta var í tölvutíma í grunnskóla fyrir meira en fimmtán árum. Þannig að ég uppgötvaði að ef ég setti mynd inn á bloggið þá kæmist hún á google. Svo var vefsíða sem ég man ekki hvað heitir, B2 eða eitthvað svoleiðis, þar sem var verið að segja slúður um fólk. Það var oft verið að tala um mig þar, þegar ég var fimmtán eða sextán ára.“

Segir hún ýmislegt bull hafa birst þar.

„Það var búið að photoshoppa myndir af mér og það var verið að segja að ég stundaði ljósabekki of mikið og alls konar svona. Fólk hefur enga hugmynd um þetta sko, þannig að þetta byrjaði frekar snemma.“

Í kjölfarið færði hún sig yfir á vefsíðuna Myspace og svo síðar yfir á þá samfélagsmiðla sem við þekkjum í dag.

„Ég sá þetta örugglega ekki sem viðskiptatól þegar ég var yngri en ég sá eitthvað tækifæri til að koma sjálfri mér á framfæri.“

Ákvað að stofna sitt eigið fyrirtæki

Hún segir þó á þeim tíma ekki hafa áttað sig á því hvernig þetta myndi þróast en samfélagsmiðlar hafa orðið stór partur af vegferð Tönju, sem er nú með rúmlega 35 þúsund fylgjendur á samfélagsmiðlinum Instagram.

„Ég var með eitt stærsta bloggið á Íslandi hvað varðar förðun og svoleiðis. Ég var með fullt af lesendum og var að fjalla um einhverjar vörur sem ég fílaði en svo gat ég ekki keypt þær viku síðar því varan var bara uppselt.

Þá hugsaði ég gæti ég fengið þessi fyrirtæki til að greiða mér í staðinn fyrir auglýsingu? Ég kannaði það og mjög mörg fyrirtæki voru bara ekkert komin á þann stað. 

Þannig að þá hugsaði ég að í staðinn fyrir að auglýsa önnur fyrirtæki sem vilja ekki greiða mér þá get ég bara stofnað mitt eigið og þá fæ ég í rauninni allan gróðann.“

Því ákvað Tanja Ýr að stofna fyrirtækið Tanja Yr Cosmetics sem er ekki lengur til en hún rak í um áratug.

„Svo var ég líka orðin svolítið þreytt á því að fyrirtæki væru ekki að greiða fyrir þessar auglýsingar sem voru að virka gríðarlega vel. Þá stofna ég einmitt fyrstu umboðsskrifstofu á Íslandi fyrir áhrifavalda til að byggja þennan markað upp,“ segir Tanja og á þá við um Eylendu.

Feimin sem barn

Tanja Ýr segist ekki hafa getað séð fyrir sér að líf hennar myndi þróast í þessa átt. Sem barn segist hún hafa verið mjög feimin.

„Ég vildi til dæmis helst ekki standa fyrir framan bekkinn að flytja verkefni. Frekar vildi ég gera verkefnið fyrir hópinn og þau myndu svo kynna það og ég væri veik þann daginn,“ segir Tanja hlæjandi. Þannig að það er akkúrat öfugt við það sem ég er að gera í dag.

Þrátt fyrir feimnina var þó eitt sem Tanja Ýr minnist þess að hafa viljað sem barn.

„Þegar ég var yngri sagði ég alltaf við mömmu að ég ætlaði að verða rich bitch,“ segir hún og skellir upp úr.

„Þannig að það hefur alltaf verið mér ofarlega í huga að mig langar að ná langt og til þess langar mig að eiga mín eigin fyrirtæki.“

Mistökin mikilvægur lærdómur

Hún segir mistökin órjúfanlegur og mikilvægur þáttur af ferlinu.

„Ég er búin að gera svo ótrúlega mikið af verkefnum og helmingurinn af þeim hefur ekki virkað. Og ég mun pottþétt búa til eitthvað aftur sem á ekki eftir að ganga upp.

Eins mikil klisja og fólki finnst þetta um að þú lærir mest af mistökunum þá er það bara svo ótrúlega satt. Ég er svo ófeimin við að gera mistök. 

Mér hefur mistekist það harkalega að það var fyrir framan alla þjóðina liggur við. Það fór til dæmis á flestar fréttasíður þegar Eylenda fór á hausinn. Það lét mig verða miklu óhræddari við að gera mistök.“

Hún segir verðmætt að geta deilt því með fylgjendum sínum.

„Ég get sýnt fólki sem fylgir mér að það er í lagi að mistakast og það gerðist ekkert hræðilegt. Jú jú, kannski var ég þung á mér í einhvern tíma eða trúði ekki á mig og svo bara fór það.“

Tanja Ýr segir þetta krefjandi ferli því hafa verið gríðarlega lærdómsríkt og í raun mjög verðmætt veganesti út í lífið og inn í framtíðina.

Hægt er að hlusta á viðtalið við Tönju Ýr í hlaðvarpsformi á öllum helstu streymisveitum undir nafni Einkalífsins.