Engu til sparað í stórglæsilegu einbýlishúsi í Fossvogi

Eigendur eignarinnar eru hjónin Alma Ösp Arn­órs­dótt­ir, stofn­andi Studio VOLT, og Snorri Freyr Fairwe­ather hönnuður. Þau keyptu húsið árið 2021 og hafa gert það upp á einstakan hátt. 

Loftgluggi og marmari

Í eldhúsi er dökk spónlögð eikarinnrétting upp í loft. Á borðum, eyju og á vegg er fallegur marmari með áberandi æðum sem gefur rýminu glæsilegt yfirbragð. Loftgluggi fyrir ofan eyjuna gefur rýminu tignarlegt yfirbragð.

Á gólfum er gegnheilt niðurlímt eikarparket í fiskibeina mynstri. Óhætt er að segja að engu hefur verið til sparað við endurhönnunina.

Í húsinu eru samtals fjögur svefnherbergi, tvö baðherbergi og stórar og bjartar stofur.

Arinn úr sjónsteypu

Í stofunni er arinn gerður úr sjónsteypu sem gefur stofunni flotta heildarmynd.

Snorri sýndi frá uppbyggingu arinsins á Instagram-síðu sinni.

Íslensk og skandinavísk hönnun

Borðstofan er búin fallegum hönnunarvörum. Við borðstofuborðið er glæsileg hönnun Sveins Kjarval,  Kjarvalsstóllinn. Hönnun frá árinu 1954.

Ljósin yfir borðstofuborðinu heita Multi-Lite og er hönnun frá árinu 1972 eftir danska arkitektinn og hönnuðinn Louis Wisdorf á Gullaldarárunum.

Á veggnum má sjá String-hillur úr svörtu stáli og hnotu, hannaðar af sænska hönnuðinum Nisse Strinning árið 1949.

Nánari upplýsingar um eignina má finna á fasteignavef Vísis.