Ver fúlgum fjár í lögmenn

Í lok síðasta mánaðar sat Trump, samkvæmt opinberum gögnum, á 37,5 milljónum dala í kosningasjóðum sínum. Það var næstum því jafnmikið og aðrir sem sækjast eftir tilnefningu Repúblikanaflokksins fyrir forsetakosningarnar á næsta ári áttu samtals.

Tim Scott átti 13,3 milljónir. Ron DeSantis átti 12,3 milljónir og Nikki Haley átti 11,6 milljónir. Aðrir áttu mun minna.

Joe Biden, forseti, átti 32,2 milljónir.

Samkvæmt frétt New York Times sýna þessi opinberu gögn ekki heildarmyndina af stöðu framboða, þar sem svokallaðar pólitískar aðgerðanefndir, eða PAC, þurfa ekki að gefa upp upplýsingar um fjármál fyrr en í upphafi næsta árs.

Ólöglegt er að greiða lögmönnum úr kosningasjóðum vegna mála sem tengjast framboðinu ekki beinum hætti en þetta á ekki við pólitískar aðgerðanefndir.

Gífurlegur lögfræðiskostnaður

Pólitísk aðgerðanefnd Trumps, sem kallast Save America, hefur eytt nærri því 37 milljónum dala til rúmlega sextíu lögfræðistofa frá janúar í fyrra. Það samsvarar meira en helmingi allra fjárútláta aðgerðanefndarinnar, samkvæmt frétt AP fréttaveitunnar.

Á fyrri hluta þessa árs eyddi Save America rúmum tuttugu milljónum í lögfræðikostnað, sem var meira landsnefndir bæði Repúblikanaflokksins og Demókrataflokksins eyddu samanlagt á sama tímabili.

Að mestu fóru umræddar greiðslur til lögmanna sem hafa verið Trump í þeim mörgu dómsmálum sem hann stendur frammi fyrir. Save America hefur einnig greitt lögfræðiskostnað fyrir fyrirtæki hans, börn og fyrrverandi ráðgjafa og starfsmenn.

Þetta hefur vakið upp spurningar um það hvort umræddir lögmenn hafi hag skjólstæðinga sinna í huga eða hag Trumps.

Einn fyrrverandi starfsmaður Trumps fékk í sumar nýjan lögmann og það fyrsta sem hann gerði í kjölfarið var að draga vitnisburð sinn í máli Jack Smith, sérstaks rannsakanda dómsmálaráðuneytisins, á meðhöndlun Trumps og leynilegum og opinberum gögnum, til baka.

Starfsmaðurinn, sem heitir Yuscil Taveras, hafði áður haldið því fram að hann hafi ekki vitað til þess að einhver hafi reynt að eyða upptökum öryggismyndavéla í Mar-a-Lago.

Þegar hann komst að því að hann væri til rannsóknar og væri grunaður um að hafa sagt ósatt skipti hann um lögmann og í júlí breytti hann framburði sínum og veitti upplýsingar sem gáfu til kynn að Trump og aðstoðarmenn hans, sem heita Waltine Nauta og Carlos De Oliveira, hefðu reynt að hindra framgang réttvísinnar með því að eiga við sönnunargögn.

Safnar út á ákærur

Trump varð fyrsti fyrrverandi forseti Bandaríkjanna til að verða ákærður en er aftur í forsetaframboði. Það að hann hafi verið ákærður virðist hafa reynst honum vel í fjáröfluninni og gerir hann út á það í fjáröflunarskilaboðum til stuðningsmanna sinna.

Þar stillir hann sér upp í baráttu við spillt dómskerfi og hefur hann notað dómshús sem svið í kosningabaráttu sinni. Á það sérstaklega við í New York, þar sem verið er að rétt yfir honum vegna fjársvika sem hann hefur verið dæmdur fyrir.

Sjá einnig: Hafi hagnast um hundrað milljónir dala á haugalygi

Hann gerði það sama þegar hann var handtekinn í Georgíu og hefur hann selt um 47 þúsund, boli, kaffibolla og veggspjöld af mynd sem tekin var honum í fangelsi í Georgíu í ágúst.

Í greiningu AP segir að fjármálagögn framboðs Trumps sýni aukningu í fjáröflun, sem samsvari við vendingar í dómsmálunum gegn honum.

Donald Trump stendur frammi fyrir fjórum ákærum.