Í fréttum Stöðvar 2 var Flugminjasafn Egils Ólafssonar heimsótt. Egill lést fyrir aldarfjórðungi en sonur hans, Kristinn Þór, hefur annast flugsafnið eftir að það var skilið frá Byggðasafninu á Hnjóti.
Þar má sjá gamlar flugstöðvar frá hinum ýmsu stöðum. Ein er gamalt stýrishús af báti en aðrar staðlaðar byggingar frá Flugmálastjórn.
„Þetta var smíðað í einingum og flutt síðan út á land þar sem þessar flugstöðvar voru reistar. Þetta eru einu eintökin sem til eru, sem upprunaleg eintök frá upphafi flugsins, það er landflugsins,“ segir Kristinn.
Stærsta byggingin er gamla Vatnagarðaskýlið, byggt 1930 yfir fyrstu sjóflugvélina, og stóð upphaflega þar sem nú er Sundahöfn í Reykjavík. Járnið utan á skýlinu er nýlegt en grindin upprunaleg og hugmyndin er að það hýsi meginsafnið í framtíðinni.
Varnarliðsþristur fyrir utan vekur jafnan athygli.
„Þetta er mjög vinsælt myndefni. Hér koma túristarnir upp og hlaupa hérna að vélinni og það eru teknar myndir.“
Þarna er framhluti af DC-6 sem var í hjálparflugi í Biafra-stríðinu og íslenskir flugmenn flugu, þeirra á meðal Þorsteinn Jónsson.
„Þetta er vélin sem hann getur um í bók sinni þegar skotið var á hann.“
-Þannig að skothríðin var í gegnum þessa vél?
„Nákvæmlega þessa vél. Ekkert öðruvísi,“ svarar Kristinn.
Í einni af gömlu flugstöðvunum er flugsagan rakin. Hann sýnir okkur útskorið listaverk eftir Ríkarð Jónsson myndhöggvara.
„Þetta er úr fyrstu vél sem kom til landsins.“
-Þeirri sem flaug í Vatnsmýri árið 1919?
„Já, nákvæmlega.“
Verkið er skorið úr loftskrúfu fyrstu flugvélar Íslendinga. Svo vill til að í Reykjavík varðveitir Íslenska flugsögufélagið einnig bút úr skrúfublaði sömu vélar. Formaður félagsins, Sigurjón Valsson, staðfestir uppruna gripsins fyrir vestan.
„Hann er líka úr skrúfunni af Avro 504. Það er staðfest að Ríkarður Jónsson fékk hluta úr skrúfunni og skar út það verk,“ segir formaður flugsögufélagsins en ekki er vitað um neina aðra gripi úr þessari fyrstu flugvél Íslendinga.
Í Örlygshöfn viðurkennir Kristinn Þór að sín bíði stórt verkefni.
„Það er í mínum höndum að sjá til þess að þetta fái þá reisn sem það þarf að hafa og munstrist inn í heildarsafnasvæðið hér á Hnjóti,“ segir Kristinn Þór Egilsson, bóndi á Hnjóti í Örlygshöfn.
Hér má sjá frétt Stöðvar 2:
