Gústi bakari ljóstrar upp leyndar­málinu að bestu pítsu Reykja­víkur

Tímaritið hefur frá árinu 2009 tilnefnt staði í Reykjavík ár hvert fyrir yfirburða mat, drykki, menningartengda viðburði og aðra hluti sem draga fólk að miðbænum.

Bakabaka var valinn besti nýliðinn í fyrra en hreppti titilinn í ár eftir að Flatey pítsa bar sigur úr býtum síðastliðin fjögur ár.

Góð pítsa ekki flókin

Fjöldi gesta mættu og samfögnuðu staðnum í dýrindis pítsuveislu og hlustuðu á vel valin lög DJ. Ívars Péturs.

En hvert er leyndarmálið á bakvið bestu pítsu Reykjavíkur?

„Góð pítsa er nú ekki flókin. Fullkominn botn, bakaður á eldi með bestu mögulegu tómötum á toppinn,“ segir Ágúst Fannar Einþórsson, eða Gústi bakari, einn af eigendum BakaBaka.

Hann segir uppskriftina enn í mótun til að fá pítsuna ennþá betri. 

„Við sækjum tómatana frá Sikiley sem heita siccagno. Þeir eru alveg stórmerkilegir, með einstakt tómatabragð, frekar litlir með mjög þykkt hýði og vaxa nánast án vatns. Heimamaðurinn kallar þá Red gold of sicily en ég kalla þá bara tómata,“ segir Gústi.

Þá buðu Vínstúkan Tíu sopar og Rætur og vín upp á afbragðs náttúruvín sem rann ljúffenglega niður kverkar veislugesta.

Líkt og meðfylgjandi myndir gefa til kynna skemmtu gestir sér einstaklega vel og fóru saddir heim.