Hver vill ekki eiga eitt kósí­kvöld í desem­ber?

Þetta er í fyrsta skipti sem þau Rakel og Kjalar leiða saman hesta sína. Þau segjast bæði virkilega sátt með útkomuna og geta vel hugsað sér að henta í annað lag fyrir næsta vor sem dúett. Lagið er eftir lagahöfundinn Gunnar Inga Guðmundsson og textinn er eftir Gústaf Lilliendahl.

Að sögn Gunnars varð lagið til þegar hann var að fletta í gegnum símann sinn. 

„Ég fann óvænt lítinn lagbút og fannst hann bæði góður og grípandi. Það tók nokkurra stund að fullklára lagið en sumir kaflar voru erfiðari en aðrir hvað lagasmíðina varðar. Ég sendi prufu upptöku á Rakel og Kjalar og þau voru strax til í þetta. Eftir það sendi ég lagið á Gústaf þar sem við köstuðum hugmyndum á milli okkar um það hvað textinn ætti að fjalla um og þetta er útkoman. 

Mig langaði til að útfæra lagið í nútímalegum 80’s stíl og tel ég það hafa tekist mjög vel. Ég er mjög sáttur við útkomuna og upptökuferlið gekk mjög vel.”

Jóla nútvitundar hugvekja

Spurður um hvað lagið fjalli segir Gunnar það vera hálfgerða jóla núvitundar hugvekju.

„Það fjallar um tilhneigingu fólks í kringum jólahátíðina að einblína á hluti sem skipta engu máli. Þegar öllu er á botninn hvolft er það samveran sem skiptir mestu máli. 

Það er mikilvægt að taka öll litlu augnablikin sem gerast á aðventunni og gefa þeim meira rými frekar en stressið og álagið sem við eigum til að gefa of mikið pláss í tilverunni. 

Hvort sem það er klisja eða ekki þá er samt mikilvægt að staldra aðeins við og njóta saman. Það má segja að Kósíkvöld í des sé einhverskonar jóla núvitundar hugvekja sem minnir okkur á hvað það er sem skiptir máli í amstri dagsins.”

Gáfu öll út plötur á árinu

Kjalar spratt fram á sjónarsviðið síðastliðinn vetur með þátttöku sinni í Idol stjörnuleit og Söngvakeppni sjónvarpsins og vakti þar mikla athygli. Hann segist hafa verið umkringdur tónlist allt sitt líf. Kjalar gaf út plötuna Kjalar við píanóið þann 6.október sem er hans fyrsta plata og hlaut góðar viðtökur.

Tónlistarferill Rakelar hófst með sigri hennar í Söngvakeppni Samfés árið 2004. Síðan þá hefur hún stundað nám í Tónlistarskóla FÍH, stofnað hljómsveitina Hinemoa og sungið raddir í ýmsum verkefnum, nú síðast á Halloween horror show sem og á afmælistónleikum með Stjórninni sem bakrödd.

Þetta er í annað sinn sem þau Gunnar og Rakel vinna saman en á síðasta ári gáfu þau saman út plötuna Jólin í hjarta mér. Þríeykið á það svo sameiginlegt að hafa öll gefið út plötur á þessu ári og fullyrða þau að lagið Jólakvöld í des eigi eftir að koma öllum í jóla-kósí stuð á aðventunni.

Áhugasamir geta hlustað á lagið í spilaranum hér fyrir neðan.