Fujimori laus úr fangelsi

Mörg hundruð stuðningsmanna forsetans fyrrverandi hópuðust í kringum bílinn þegar hann yfirgaf Barbadillo-fangelsið í höfuðborginni Líma í gærkvöldi.

Hinum 85 ára Fujimori var sleppt eftir að stjórnlagadómstóll landsins staðfesti sex ára gamla náðun forseta landsins.

Fujimori var á sínum tíma dæmdur í 25 ára fangelsi fyrir spillingar- og mannréttindabrot á þeim tíma er hann gegndi embætti forseta. Hann var kjörinn forseti árið 1990 og gegndi embættinu til 2000.

Forsetinn fyrrverandi, sem er mjög umdeildur í Perú, yfirgaf fangelsið með andlitsgrímu og í fylgd tveggja barna sinna – Kenji og Keiko Fujimori sem beið nauman ósigur í síðustu forsetakosningum.

Í frétt BBC segir að stuðningsmenn Alberto Fujimori líti svo á að hann hafi í valdatíð sinni bjargað landinu frá hryðjuverkum og efnahagshruni, en andstæðingar hans líta svo á að hann hafi verið brotið niður lýðræðislegar stofnanir landsins í þeim tilgangi að tryggja eigin völd.

Þegar Fujimori var dæmdur í 25 ára fangelsi, þá sjötugur að aldri, gerðu flestir Perúmenn ráð fyrir að hann myndi verja því sem hann ætti eftir ólifað í fangelsi. Í desember 2017 var hann hins vegar fluttur úr fangelsinu og á sjúkrahús vegna vanheilsu sinnar.