Kaup­máttur dróst saman á þriðja árs­fjórðungi

Þar kemur fram að ráðstöfunartekjur heimilageirans hafi aukist um átta prósent á þriðja ársfjórðungi nú í samanburði við sama tímabil í fyrra samkvæmt bráðabirgðatölum.

Ráðstöfunartekjur á mann numu rúmlega 1,3 milljónum króna á ársfjórðungnum og jukust um 4,8 prósent frá sama tímabili í fyrra. Á sama tíma og kaupmáttr ráðstöfunartekna dróst saman um 2,7 prósent að teknu tilliti til verðlagsþróunar og mannfjöldaaukningar hækkaði vísitala neysluverðs á sama tíma um 7,8 prósent og mannfjöldi jókst um þrjú prósent.

Gjöld og tekjur jukust

Heildartekjur heimilanna jukust um 13,1 prósent á þriðja ársfjórðungi 2023 samanborið við sama ársfjórðung í fyrra. Sá liður sem vegur hvað þyngst í aukningu heildartekna er launatekjur en þær jukust um 10,9 prósent frá sama ársfjórðungi á síðasta ári. Áætlað er að eignatekjur hafi aukist um 18,2 prósent frá sama ársfjórðungi í fyrra og að vaxtatekjur hafi aukist um 47,4 prósent á tímabilinu. Þá jukust lífeyristekjur og félagslegar tilfærslur um 11,5 prósent.

Heildargjöld heimilanna jukust um 19,7 prósent á þriðja ársfjórðungi 2023 samanborið við sama ársfjórðung í fyrra. Skattgreiðslur jukust um 12,3 prósent, tryggingagjöld um 7,7 prósent og eignagjöld um 39,4 prósent, þar af vaxtagjöld um 40,8 prósent sem er nokkuð minni hækkun en síðustu ársfjórðunga þar sem vaxtahækkanir voru byrjaðar að gera vart við sig á þriðja ársfjórðungi síðasta árs.

Fram kemur í tilkynningu Hafstofunnar að um bráðabirgðaniðurstöður sé að ræða. Hún muni birta endurskoðaðar niðurstöður þegar fyrir liggja endanlegari upplýsingar, meðal annars úr skattframtölum fyrirtækja og einstaklinga. Tölur fyrir árin 2015-2021 hafa verið leiðréttar í ársfjórðungstöflu í kjölfar birtingar í október og stemma þær nú við árstöflu tekjuskiptingauppgjörs.