Vin­sælustu lögin á FM957 árið 2023

Patrik vinsælastur

Efstu fimm lög ársins eiga það öll sameiginlegt að vera íslensk en tónlistarmaðurinn Patrik trónir á toppnum ásamt Luigi með lagið Skína. 

Patrik skaust upp á stjörnuhimininn síðastliðið vor þegar hann gaf út smáskífuna PBT. Fyrsti smellurinn hans Prettyboitjokkó situr í áttunda sæti listans. 

Patrik er með um 75 þúsund mánaðarlega hlustendur á streymisveitunni Spotify og milljónir streyma á lögin sín. Hann segist ánægður og þakklátur fyrir liðið ár og segist jafnframt vera rétt að byrja. 

„Ég er eiginlega bara meyr eftir allt þetta ár. Það er bara meira á leiðinni, alveg klárt. Plata á næsta ári og svona. Það sem stendur upp úr þegar ég lít yfir árið er lagið Skína, hvað það varð risa stórt. Ég er mjög þakklátur fyrir það. 

Svo kom þetta jólalag, prettyboi um jólin, frekar óvænt til mín og það stendur líka upp úr. Ég sé svo bara fyrir mér meiri tónlist á nýju ári og ég ætla sömuleiðis að halda tónleika,“ segir Patrik fullur tilhlökkunar fyrir 2024. 

Yfirtaka ísstrákanna

Strákasveitin Iceguys fylgir fast á eftir í öðru sæti með frumraun sveitarinnar Rúlletta. Sveitin er skipuð Rúriki Gíslasyni, Friðriki Dór Jónssyni, Jóni Jónssyni, Herra Hnetusmjöri og Aroni Can en lögin sem skipa 2. - 5. sæti listans tilheyra öll í það minnsta einhverjum meðlimi sveitarinnar. 

Herra Hnetusmjör og Friðrik Dór eru í þriðja sætinu með lagið Vinn við það, sem þeir frumfluttu á Idolinu í beinni útsendingu í byrjun febrúar.

Iceguys hreppa svo fjórða sætið með lagið Krumla en tónlistarmyndbandið fór sem eldur um sinu á Internetinu á sínum tíma. Það má sjá hér: 

Bakka ekki út, rappdúett Arons Can og Birnis, tók svo fimmta sætið en lagið sat lengi vel á Íslenska listanum á FM í ár. Aron Can og Herra Hnetusmjör tilheyra því hvor um sig þremur af efstu fimm lögum ársins. 

Árslisti FM957 árið 2023: