Magnús Már Jakobsson, öryggis- og mannauðsstjóri hjá Þorbirni hf, hefur búið í Grindavík frá árinu 1996 fyrir utan fjögur ár þar sem hann bjó á Vestfjörðum.
Vegna vinnu sinnar í Bláa lóninu og hjá Þorbirni hefur hann þurft að keyra mikið um Grindavíkurveg. Eftir banaslysið sem varð á veginum á föstudag fann Magnús sig knúinn til að vekja athygli á bágu ástandi vegarins þegar kemur að hálkuvörnum.
Í Facebook-færslu sem hann birti í gær sagði hann að hann og fleiri hafi ítrekað bent yfirvöldum á að hálkuvarnir á Nesvegi, Suðurstrandarvegi og Grindavíkurvegi væri ábótavant en það breytist lítið. Fréttastofa ræddi við Magnús um málið.
Vandamál sem Vegagerðin hafi vitað af í mörg ár
„Ég var hjá Bláa lóninu í sautján ár og þegar þú komst ofan af Þorbirni niður í lægðina þar held ég að ég hafi komið að þrjátíu útafkeyrslum þar. Þegar gufan sest úr virkjuninni verður hún bara svona glært svell,“ segir Magnús um ástandið á Grindavíkurvegi Þorbjarnarmegin.
„Úr Seltjörn, þar sem slysið var á föstudag, er mikil uppgufun. Þetta verður svo ofboðslega glært og svo rosalega sleipt,“ segir Magnús
„Þetta er vandamál sem Vegagerðin er búin að vita af í mörg ár,“ segir hann og bætir við að svo virðist sem Vegagerðin sé einfaldlega með of fáa bíla til að sinna Reykjanesinu. Ástandið sé ekki bara svona slæmt á Grindavíkurvegi heldur líka á Suðurstrandarvegi og Nesvegi þegar komið er frá Höfnum.
Þurfi að sinna hálkuvörnum mun reglulegar
„Ég er margbúinn að hringja í Vegagerðina og það eru margir aðrir búnir að gera það líka,“ segir Magnús og bætir við „Þetta gerist bara seint og illa.“
Hvað viltu þá að sé gert?
„Við viljum að þetta sé miklu reglulegar gert. Það sé bara hraðari og betri þjónusta við vegina,“ segir Magnús. Hann viti að allir séu að reyna að gera sitt besta en það þurfi meira til.
Þá segir Magnús að jarðhræringarnar í Grindavík hafi haft óvænt áhrif í för með sér. Af því Nettó hefur ekki opnað aftur í Grindavík þurfa íbúar að fara út fyrir bæinn að kaupa mat.
„Það vantar þjónustu inn í bæinn til að fólk geti keypt sér nauðsynjar og þá þarf fólk að fara þennan veg til Keflavíkur sem er stórhættulegur og jafnvel hættulegri en þessir jarðskjálftar,“ segir hann.
Magnús segir að í þau skipti sem hann hafi haft samband við Vegagerðina hafi þau verið mjög meðvituð um ástandið. „Þau eru mjög kurteis og segja bara 'Við förum eins hratt og við getum' og mjög líklega gera þau það en eru þá ekki með nægilega mikið af tækjum,“ segir hann.
Aukin vetrarþjónusta í takt við umferð og veður
Fréttastofa hafði samband við G. Pétur, upplýsingafulltrúa Vegagerðarinnar, til að spyrjast fyrir um hvort eitthvað væri til í yfirlýsingum Magnúsar um að ekki væri nóg af bílum sem sinntu hálkuvörnum á Suðurnesjum.
„Það hefur verið aukin vetrarþjónusta á vegunum í kringum Grindavík. Vetrarþjónusta er bara ákveðin eftir umferðarmagni og aðstæðum þannig það er ekkert öðruvísi á Grindavíkurvegi en annars staðar. Þetta er allt í mjög föstum skorðum,“ sagði G. Pétur í samtali við fréttastofu.
„Það eru sendir út bílar sem geta sinnt þessu eftir því sem við á. Ég held að það sé mjög ólíklegt að það séu of fáir bílar. Það er allt í föstum skorðum,“ segir hann. Það sé aftur á móti erfitt að eiga við óútreiknanlegt veðrið.
Vegagerðinni fullkunnugt um ástand vegakerfisins
„Varðandi þetta slys þurfum við að vita nákvæmlega hvað gerðist sem við vitum ekki enn þá,“ segir Pétur um slysið sem átti sér stað á Grindavíkurvegi á föstudag.
Aðspurður út í þær aðstæður sem Magnús lýsti við orkuverið og Seltjörn sagði Pétur „Það geta verið séraðstæður einhvers staðar en vetrarþjónustan ætti að vera nokkuð öflug á Grindavíkurveginum og við höfum aukið hana á Nesveginum og Suðurstrandarveginum til að halda þessum leiðum betur opnum.“
Kannast þið við að fá mikið af kvörtunum vegna Grindavíkurvegar?
„Við erum með eftirlit þannig okkur er fullkunnugt um ástandið á vegakerfinu. En við fáum reglulega kvartanir alls staðar að. Það er kallað eftir aukinni vetrarþjónustu um allt land,“ sagði hann að lokum.
