Snorri: Óttast dómínó-áhrif og ætlar ekki að reikna

Fjórir leikmenn liðsins voru inn á herbergi sínu í dag, veikir, þegar hópurinn hitti fjölmiðla á hóteli landsliðsins. Þá er Gísli Þorgeir Kristjánsson meiddur og missir af leiknum mikilvæga við Austurríki á morgun, rétt eins og Ýmir Örn Gíslason sem tekur út leikbann.

Snorri kallaði á Teit Örn Einarsson í morgun og segir mögulegt að fleiri nýir leikmenn komi inn í hópinn áður en leikur við Austurríki hefst. En hvernig er staðan á þeim veiku; Ómari Inga Magnússyni, Janusi Daða Smárasyni, Kristjáni Erni Kristjánssyni (eða Donna) og Óðni Þór Ríkharðssyni?

„Þeir eru fárveikir“

„Ég fæ nú bara upplýsingar um hvort að menn séu leikfærir eða ekki. En þeir eru fárveikir, Ómar og Janus [sem misstu af leiknum við Króatíu]. Það væri ekki möguleiki fyrir neinn af þessum strákum að spila í dag. Menn eru ekkert að leika sér að þessu. Allir tilbúnir að gera allt til þess að spila en þegar þeir segjast vera fárveikir þá eru þeir það.

Maður óttast auðvitað dómínó-áhrif. Hvað gerist á morgun og allt það. En ég reyni að velta mér ekki mikið upp úr þessu. Þetta er bara svona og ég verð með lið til að vinna leik á morgun,“ sagði Snorri í hádeginu í dag. 

Snorri var vissulega vonsvikinn yfir því hvernig fór hjá Gísla sem meiddist í sigrinum frækna á Króötum í gær:

„Auðvitað er vont að missa einn okkar besta mann, ég tala nú ekki um þegar Janus er veikur. En svona nokkuð er fylgifiskur þess að vera á stórmóti.“

Aðdáunarverðir Austurríkismenn

Austurríkismenn hafa komið öllum á óvart á EM og sprungið gjörsamlega út, eftir töp gegn Íslandi í vináttulandsleikjum fyrir mótið:

„Það hefur verið aðdáunarvert að fylgjast með þeim. Geggjað að þeir hafi bara verið að tapa fyrsta leiknum sínum í gær [gegn Frakklandi]. Þeir hafa gert marga hluti vel. Spilað mikið 7 á 6. Markvörðurinn þeirra slegið í gegn. Þeir hafa hitt á þetta, og eru með gríðarlega mikið sjálfstraust. Gott lið sem við þurfum að bera virðingu fyrir.

Á sama tíma, þrátt fyrir að við höfum spilað fínan leik gegn Króatíu, þá þurfa menn að slaka á og ýta því til hliðar, og kalla fram eitthvað betra en í gær. En allir sigrar í handbolta næra. Við þurftum á því að halda sem hópur og sem einstaklingar. Þetta gerði okkur gott en á sama tíma þurfa menn að komast niður á jörðina, og ég skynja alveg að menn eru ekki að fagna fram eftir öllu. Það er hugur og fókus í mönnum og nú er undirbúningur fyrir Austurríki.“

Hentar ekki að spá í hve stóran sigur gæti þurft

Sennilegt er að Ísland þurfi fimm marka sigur á morgun, til að enda fyrir ofan Austurríki, en hvernig er að eiga við þá stöðu?

„Ég nálgast leikinn bara með það í huga að vinna hann. Það er lykilforsenda í þessu öllu, að finna leiðir til þess. Síðan þurfum við að sjá hvernig leikurinn þróast. Ég held að það henti okkur ekki að fara að reikna þetta allt og pæla í þannig hlutum. Við þurfum bara að nálgast þetta eins og alvöru leik, vinna hann, og svo bara bregst maður við því sem gerist í leiknum.“

Næsti leikur Íslands á EM er gegn Austurríki á morgun klukkan 14:30 að íslenskum tíma. Öflugt teymi Vísis og Stöðvar 2 er í Köln og flytur fréttir af mótinu í máli og myndum.