Vilja breyta stjórnar­skrá svo á­tján ára geti orðið for­seti

Flutningsmenn frumvarpsins eru Lilja Rannveig Sigurgeirsdóttir, Hafdís Hrönn Hafsteinsdóttir, Þórarinn Ingi Pétursson, Stefán Vagn Stefánsson og Jóhann Friðrik Friðriksson.

Vilja að aldurstakmarkið verði átján ár

Í greinargerð frumvarpsins er vísað til þess að forsetaembættið sé eitt þriggja embætta sem fela í sér aldurskröfur upp á 35 ár. Hin tvö embættin eru hæstaréttardómari og landsréttardómari.

Þá vísa þeir til athugasemda við stjórnarskrárfrumvarpið 1944 þar sem fram kemur að „ekki þykir hlýða, að yngri maður en 35 ára geti orðið forseti“ þar sem forseti þarf að búa yfir, auk margs annars, „lipurð og mannþekkingu, sem ekki fæst nema með nokkrum aldri“.

„Fjölmargir einstaklingar undir 35 ára aldri gætu hæglega staðist kröfur þjóðarinnar hvað embættið varðar og sinnt því vel. Rétt eins og þjóðinni er treyst til að ákveða hæfi frambjóðenda á grundvelli menntunar og fyrri starfa, þá eigi henni einnig að vera treystandi til að taka ákvörðun um hvort frambjóðandi búi yfir „lipurð og mannþekkingu“, sérstaklega í ljósi þess að upplýsingaflæði innan samfélagsins hefur batnað til muna frá samþykkt stjórnarskrárinnar, t.d. með tilkomu alnetsins,“ segir meðal annars í greinargerðinni.

Mat flutningsmanna sé að afnema eigi skilyrði um að forsetaefni skuli hafa náð 35 ára aldri á kjördag. Þess í stað ætti aldurstakmark til forsetaframboðs að miðast við kosningarétt, eins og í alþingiskosningum.

Þá segja þau að reglan um að einstaklingur þurfi að vera orðinn 35 ára til að geta orðið forseti lýðveldisins sé tímaskekkja og sýnir ákveðið vantraust gagnvart kjósendum til að velja hæfasta einstaklinginn í embættið.

Formaður SUF þegar boðið sig fram

Gunnar Ásgrímsson, formaður Sambands ungra Framsóknarmanna, lýsti yfir að hann hygðist bjóða sig fram til forseta í skoðanagrein á Vísi fyrr í mánuðinum. Gunnar, sem verður 23 ára þegar gengið verður til forsetakosninga í júní, sagði stjórn SUF krefjast að við við allar framtíðarendurskoðanir á stjórnarskrá verði unnið að því að fella niður regluna um aldurstakmarkanir frambjóðanda til embættisins.

Gunnar ræddi áformin í Reykjavík síðdegis sama dag. Hægt er að hlusta á viðtalið hér að neðan.