Freyja Haralds komin með kærasta

Freyja upplýsti í færslu á Instagram í ársbyrjun að hún hefði á haustmánuðum blásið í sig kjark og farið á Tinder stefnumót. Það hefði reynst afdrifaríkt. Mánuði eftir þá færslu, á sjálfan bóndadaginn, er Freyja skráð í samband.

David er samkvæmt Facebook-síðu sinni í námi við Háskóla Íslands. Hann er frá Kumasi í Gana en búsettur á Íslandi.

Freyja hefur unnið marga sigra í baráttu sinni við kerfið undanfarin ár. Þar á meðal að verða fósturforeldri.

„Ég er unglingafósturmamma, tók á móti unglingsdreng í fóstur í lok sumars 2021,“ segir Freyja um það þegar hún fékk hinn fimmtán ára Steve í fóstur.

„Ég er búin að vera ein af mömmum hans í tæp tvö ár. Það er magnað.“

Steve er frá Gana líkt og nýi kærastinn David.

Freyja ræddi ferlið í Íslandi í dag í fyrra.

Magnaður ferill

Freyja sem verður 38 ára í sumar fæddist með beinbrotasýki en sjúkdómurinn lýsir sér þannig að bein brotna auðveldlega. Árið 1997 flutti Freyja með fjölskyldu sinni til Nelson í Nýja Sjálandi og gekk þar í skóla. Freyja er með bakkalárgráðu frá Háskóla Íslands í þroskaþjálfafræði og meistaragráðu í kynjafræði.

MA-ritgerð Freyju fjallaði um mismunun gegn fötluðum konum á Íslandi á grundvelli kynferðis.Freyja stundar nú doktorsnám við HÍ í menntavísindum. Hún hefur undanfarin ár starfað sem réttindagæslumaður fatlaðs fólks.

Hún hefur beitt sér fyrir bættri þjónustu fyrir fatlaða, og var um tíma framkvæmdastjóri NPA-miðstöðvarinnar sem vinnur að framgangi þess að fatlaðir fái aukna aðstoð í formi notendastýrðrar persónulegar aðstoðar. Freyja er talskona Tabú, sem er femínísk hreyfing fatlaðra kvenna.

Freyja var kjörin á íslenska stjórnlagaþingið árið 2010 og tók þátt í því að semja frumvarp að nýrri stjórnarskrá fyrir Ísland sem var skilað inn þann 27. júlí árið 2011. Freyja var varaþingmaður Bjartrar framtíðar í Suðvesturkjördæmi frá 2013 til 2015.

Árið 2007 kom bókin Postulín út, en hún er ritað af Freyju og Ölmu Guðmundsdóttur og hefur að geyma sögu Freyju. Sama ár útnefndi tímaritið Nýtt líf Freyju sem Konu ársins í árlegri útnefningu tímaritsins.

Baráttan fyrir foreldrahlutverkinu

Árið 2014 óskaði Freyja eftir því að gerast fósturforeldri en Barnaverndarstofa hafnaði ósk hennar um að taka þátt í námskeiði sem er forsenda þess að hægt er að meta hæfni fólks til að taka barn í fóstur. Freyja kærði úrskurðinn til úrskurðarnefndar velferðarmála sem staðfesti niðurstöðu Barnaverndarstofu.

Freyja gafst ekki upp og kærði úrskurðinn til héraðsdóms sem staðfesti úrskurð nefndarinnar. Málinu var síðar skotið til Landsréttar sem komst að þeirri niðurstöðu að Barnaverndarstofa hefði mismunað Freyju á grundvelli fötlunar hennar. Hæstiréttur staðfesti úrskurð Landsréttar og Freyja gat því sótt námskeiðið.

Að námskeiði loknu og að loknu matsferli staðfesti Barnaverndarstofa í apríl 2021 að Freyja væri hæf til að taka að sér barn í fóstur. Síðan þá hefur hún verið eitt fósturforeldra Steve.

Freyja ræddi ferðalag sitt til fósturforeldris Spjallinu með góðvild árið 2021.