Modrić hetja Real Madríd

Gamla brýnið Luka Modrić reyndist hetja toppliðs Real Madríd þegar hann skoraði eina markið í sigri á Sevilla í La Liga, spænsku úrvalsdeildinni í knattspyrnu, í kvöld. Sigurinn þýðir að Real er nú með 9 stiga forskot á toppi deildarinnar.

Spánarmeistarar Barcelona unnu stórsigur í gær, laugardag, og settu þar með örlitla pressu á topplið Real sem hefur spilað nær óaðfinnanlega það sem af er leiktíð. Liðið var þó töluvert frá sínu besta í kvöld og færa má rök fyrir því að sigurinn hafi verið óverðskuldaður ef horft er í tölfræðina. Jafntefli eflaust rétt niðurstaða en að því er ekki spurt.

Heimamenn í Real komu boltanum vissulega í netið snemma leiks en brot dæmt í aðdragandanum og markið því ekki gilt. Staðan markalaus í hálfleik og lengi vel stefndi í að það yrði einfaldlega staðan þegar flautað yrði til leiksloka.

Carlo Ancelotti, þjálfari Real, er hins vegar eldri en tvævetur og þegar stundarfjórðungur lifði leiks setti hann Modrić inn fyrir miðvörðinn José Ignacio Fernández Iglesias, betur þekktur sem Nacho. Sú skipting átti heldur betur eftir að skila sér en sex mínútum síðar skoraði Króatinn það sem reyndist sigurmarkið.

Modrić tókst þá að búa sér til örlítið pláss fyrir utan teig og beið ekki boðanna, hann lét vaða að marki og boltinn söng í netinu. Staðan orðin 1-0 og reyndust það lokatölur í kvöld.

Sigurinn þýðir að Real er með 65 stig á topp La Liga, Barcelona kemur þar á eftir með 57 stig á meðan Girona er með 56 stig og leik til góða í 3. sæti.