Él norðan­til en bjart­viðri suð­vestan­lands

Á vef Veðurstofunnar kemur fram að það dragi úr vindi og úrkomu með morgninum og verði víða léttskýjað síðdegis. Fremur kalt verður í veðri, en hiti að fimm stigum við suðurströndina að deginum.

„Hæg breytileg átt á morgun, miðvikudag og ætti þá að sjást til sólar víða um land, þykknar upp um landið vestavert og sums staðar él um kvöldið.

Á fimmtudag má búast við dálitlum éljum við vesturströndina, en ætti að vera þurrt í öðrum landshlutum,“ segir í hugleiðingum veðurfræðings.

Veðurhorfur á landinu næstu daga

Á miðvikudag: Hæg breytileg átt og skýjaðu, en bjart að mestu sunnan jökla. Frost víða 1 til 7 stig, en frostlaust sunnantil að deginum.

Á fimmtudag: Austlæg átt, 3-10 m/s og skýjað með köflum, en dálítil él við vesturströndina. Hiti breytist lítið.

Á föstudag: Fremur hæg norðaustanátt með dálitlum éljum, en víða bjartviðri sunnan- og vestanlands. Hiti svipaður.

Á laugardag: Vaxandi norðaustanátt með éljum, einkum austantil, en víða bjartviðri suðvestantil. Heldur kólnandi í bili.

Á sunnudag: Norðanátt og él á norðanverðu landinu, en bjart og þurrt syðra. Frost um mest allt land.

Á mánudag: Útlit fyfir minnkandi norðlæga átt, skýjað og dálítil él, en lengst af þurrt og bjart fyrir sunnan. Hlýnar heldur.